Ikiaroornartup akiorniarneqarnera iluatsilluartoq

Politiit akileraartarnermilu nakkutilliisut suleqatigiilluarnerata kingunerisaanik Nunatsinni ikiaroornartup akiorneqarnera iluatsilluarpoq.

Angut 32-inik ukiulik danskeq Sisimiuni najugaqartoq hashimik 10 kilomik qanittukkut eqqussisimasutut ukiut pingajuat affaq pinerluuteqarsimasunut inissiisarfimmiittussanngorlugu pineqaatissinneqarpoq.

Danskeq 25-inik ukiulik ikiorsiissutinik inuussuteqartoq qaammatini sisamani pinerluuteqarsimasunut inissiisarfimmiittussanngorlugu ippassaq pineqaatissinneqarpoq.

Taassuma ikiaroornartoq hash kiilu ataaseq nammattakkaminut mersuullugu tallimanngormat kingullermik Nunatsinnut eqqunniarsimavaa. Qimmimit narajorneqarmat tamanna paasineqarpoq.

Ikiaroornartoq pillugu politiit paasiniaasatoqatigiivisa Nuummiittut, nunatsinni Danmarkimilu politiit pisortallu suliffeqarfii allat suleqatigisarnerini paasineqartartut amerliartorput.

Haship eqqussorneqartarnera qiviaraanni takuneqarsinnaavoq allanngorartinneqartuartut, kriminalassistent Finn Jeppesen ikiaroornartoq pillugu politiit paasiniaasartoqatigiivisa pisortaat taama oqarpoq, arnat qallunaat inuusuttut ukiukitsut upernaaq eqqussuisut, angutilli eqqussueqqilersut malunnartoq.

Danmarkimi akileraartarnermik nakkutilliisoqarfik suleqatigilereerparput, taakkulu eqqummaarinnerulernikuupput.

Suleqatigiilernerup kingunerisaanik ikiaroornartoq pillugu politiit paasiniaasartoqatigiivisa inuit isertitaqarpiartanngitsut pisiniarujussuartartut nakkutiginerulersinnaasimavaat. Taama suleqatigiinnerup kingunerisaanik danskeq Sisimiuni najugaqartoq paasineqarpoq.

Isertitai misissorlugit paasinarsivoq isertitani sinnerlugit pisiniartarsimasoq.

Paasiniaasartoqatigiit angutinik sisamanik inuttaqarput qimmimillu ataatsimik narajuisartumik ikiorteqarlutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat