Ikiaroornartup akiorniarneqarnera iliuuseqaqataaffiginiarpaa

Ikiaroornartumik atuineq tuniniaasarnerlu nunatsinni annikillisinnissaa imaaliallaannaq pinavianngilaq. Atuinerup tuniniaasarnerullu annikillisarnissaanut suliniutit nukissallu katersorneqaqqaartariaqarput, taamma peqqissutsimut naalakkersuisoq Asii Chemnitz Narup naliliivoq. Imigassaq Ikiaroornartorlu pillugit siunnersuisoqatigiit siunnersuutai sorsoqataaffigissallugit piareersimaffiginiarpai.

- Aasaq siunnersuutigineqartut takugakkit nuannaarpunga, takusinnaagakku nassuerutiginninnertalimmik imaqartut; imatut paasillugu angakkuarnerinnarmik nunatsinni ajornartorsiutaasoq tamanna qaangernavianngikkipput. Kisiannili erseqqissumik tamatuma akiorniarnissaanut suliniuterpassuit ingiaqatigiissillugit aalluttariaqarivut, taamaalilluni naalakkersuisut suliniutaannut tunuliaqutsiisutut immata, Asii Chemnitz Narup nassuiaavoq. Aamma siunnersuummi marlussuit uniffigisimanerarpai, ilaatigut nunatsinni tamakkiisumik suliniutitut maannamut aallartissinnaasimanngisat, tassa suliniutit pitsaalluinnartumik misilittagaqarfigineqalersimasut immikkut misissuiffigeriarlugit maligassatut tamanut atortussanngortinneqarnissaat.

- Taamaaliornissatsinnut suli nukissaqanngilagut, taamaattorli tamanna pingaaruteqartorujussuuvoq, kiisalu aamma suliniutit ilisimatuussutsikkut nalilersorneqartarnissaat, tamakkuli aningaasalersorlugillu sulisoqarnikkut nukissatigullu siunissami qaninnermi aalajangiiffigisariaqassavagut. Asii Chemnitz Narup nassuiaavoq.

Ilanngullugu oqarpoq sinerissami kommunini suliniuterpassuit pitsaasut ingerlanneqareersut katersornissaannut nukissaq suli amigaatigineqartoq, maannamulli ilisimalikkat katersoriarlugit nalilersorneqaqqaartariaqartut, kingornalu siammarterneqassasut. Tamakkuli anguniarnissaanut suli sanngiiffeqartugut erseqqissaatigaa.