Ikiaroornartunik sakkortuunik eqqusseriaq pineqaatissinneqarpoq

Ilulissani angut 27 inik ukiulik aanngajarniuutinik iisartakkanik ecstasy-nik 26-inik kokain-imillu grammimik ataatsimik nunatsinnut eqqusseriaraluartoq februaarip 28-iani Ilulissat mittarfianut tikinnermini politiinit tigusaavoq.

Ilulissani angut 27 inik ukiulik iisartakkanik ecstasy-nik 26-inik kiisalu kokain-imik grammimik ataatsimik nunatsinnut eqqusseriaraluartoq qaammatini arfineq pingasuni pinerluuteqarsimasunut isertitsivianniitttussanngorlugu pineqaatissinneqarpoq.

Nunatsinni politiit qimmii aanngajaarniutinik ujaasinerni atorneqartartut naamallaqqilluinnartuupput.

Qimmit taakku aangajaarniutinik ecstasy-nik, kokain-inik, amfetamin-inik aanngajaarniutinillu allanik naamasinnaapput, taama oqarpoq Nuummi politeeq Bjørn Bjerregaard.

Politiit aangajaarniutinik tunngasunik suleriaatsiminnik paasissutissiinissaminnut tunuarsimaarput, kisiannili politiit eqqartuussisorisuat Morten Nielsen oqarpoq aangajaarniutinut tunngasunik paasiniaanerminni immikkut sulisoqarlutik.

Siornatigut aanngajaarniutinik hash-iunngitsunik nunatsisinni tigusaasoqarpoq Narsami februaari 2000-imi.

Taamanikkut angut 30 inik ukiulik amfetamininik 0,3 gramminik kiisalu hash- imik 300 gramminik tigumiartoq tigusarineqarpoq.

Angut tigusaavoq imerniartarfimmi amfetaminimik saassaalliuteqarsimasoq politiinut nalunaarutigineqarnerata kingorna politiit angerlarsimaffiani misissuinerminni amfetamin hash-ilu nassaarimmassuk.

Angut hash-imik 300 gram-inik amfetaminimillu 0,3 gramminik eqqussisimanini pillugu ullut 60 - it pinerluuteqarsimasut isinissiisarfimmiittussanngorlugu pineqaatissinneqarpoq.