Ikiaroornartunik eqqussianiarneq ajornarnerulissaaq
Nunatsinnut ikiaroornartunik eqqussiniartarneq ajornarnerulertariaqarpoq. Taama Inatsisartut ukiuunerani ataatsimiinnerminni aalajangerput. Sukannernerusumik nakkutilliisoqalerneratigut nunatsinnut ikiaroornartunik eqqussiniartarneq pinaveersaartinniarneqarpoq.
Ikiaroornartumik nunatsinnut eqqussiniartarnerup ajornarnerulersinneqarnissaanik Atassut Inatsisartuni siunnersuuteqartuuvoq, siunnersuutigineqartorlu Inatsisartunit tamanit taperserneqarpoq.
Atassutip siunnersuutaa illoqarfiinnaanngitsuni aammali nunaqarfinni inatsisinik unioqqutitsilluni ikiaroornartunik tuniniaasoqartarneranik tunngaveqarpoq.
Ikiaroornartoq hashi nunatsinni atugaanerpaasutut maannamut nalilerneqartarpoq, ukiunili kingulliunerusuni ikiaroornartunik allanik navianarnerusunik soorlu ecstacymik kokainimik amfetamenimillu nunatsinnut eqqusseriartoqartareerpoq. Kingullertigut angut 27-inik ukiulik ikiaroornartumik ecstacymik nunatsinnut eqqusseriaraluartoq politiinit tigusarineqarpoq.
Eqqussisoqarsinnaaneranut nakkutilliinerup sukannernerulersinneqarnissaata saniatigut ikiaroornartumut pinaveersaartitsiniarluni suliniarnermi sutigut pitsanngorsaasoqarsinnaanera Naalakkersuisunit nalilersorneqassaaq.
Mittarfinni nakkutilliineq pitsanngorsarneqassaaq. Akileraartarnermut pisortaqarfik nakkutilliinermut akisussaassuuvoq, nakkutilliinerullu pitsanngorsarneqarnissaa pillugu Danmarkimi oqartussanik isumaqatigiinniarnissat tullinnguuttut, pisortaqarfimmi allaffiup isortaa Ferdinand Hammeken ilisimatitsivoq.
Akileraartarnermut Pisortaqarfik Danmarkimilu akileraartarnermut ministeri siornaak 2004-mi isumaqatigiissuteqarput. Isumaqatigiissut nunatsinnut nioqqutissanik tassungalu ilanngullugu aanngajaarniutinik eqqussuinermut tunngasunik imaqartoq, ilaatigut qimmit ikiaroornartunik ujaasinermi atorneqartartut amerlisinneqarnerannik kinguneqarsimasoq, maanna pitsanngorsarneqassaaq.
