Ikiaroornartunik ecstacy-nik kokainimillu nunatsinnut eqqusseriartoq pineqaatissinneqarpoq

Nunatsinni siullermeerluni ikiaroornartunik iisartakkanik ecstacy-nik kokaimillu eqqusseriartoqarsimavoq, angullu 27nik ukiulik Ilulissat eqqartuussivianni ikiaroornartunut inatsimmik unioqqutitsisimasutut eqqartuunneqarpoq.

Angut 27nik ukiulik ikiaroorniutinik iisartakkanik ecstacynik taaneqartartunik 26nik, ikiaroornartumillu sorlukkut ilummoorunneqartartumik kokainimik gramimik ataatsimik eqqussisimasutut Ilulissani eqqartuussiviup ullumi qaammatini arfineq pingasuni pinerluuteqarsimasut inissinneqartarfianniittusanngorlugu pineqaatissinneqarpoq.

Angutip pineqaatissinneqarnini sivisugaa, unnerluussisulli inissinneqarnera sivitsoqquaat. Ilulissani eqqartuussiviup aalajangerpaa suliap nunatta eqqartuussivianut ingerlatinneqannginnerani eqqartuunneqartoq tigummisaassasoq.

Ikiaroorniut ecstacy aatsaat nunatsinni arsaarinnissutigineqarpoq, siusinnerusukkullu Danmarkimi inuusuttunit arlalissuarnit toqqutigineqartarsimalluni.