Ikiaroornartumut nalunaarusiaq saqqummerpoq
Naalagaaffiit Peqatigiit ikiaroornartoq pillugu akiuiniaqatigiiffiata ukiumoortumik nalunaarusiani ullumi saqqummiuppaa.
Taanna qimerluualaaraanni nuanniitsortaqarlunilu nuannersortaqarpoq.
Afghanistanimi pikitsitsiniat talebanit 2001-imi uppisinneqarnerisa kingorna ikiaroornartumik opiumimik naatitsisartut heroiniliortartullu ikiliartulersimasut nalunaarusiami nuannersortaavoq.
Pikititsiniat talebanit opiumimik naatitsisarneq inerteqqutaatippat. Taakkulu uppisinneqarmata naasorissaasut piitsorpassuit uumaannarusullutik opiumimik naatitsisalerput.
Naalagaaffit Peqatigiit ikiaroornartoq pillugu akiuiniaqatigiiffianni siuttup, Antonio Maria Costap, nunani allani opiumimik naatitsisarnerup nuussimanissaa aarleqqutigaa oqarluni:
- Inuppassuit ikiaroortartuupput ikiaroornartullu akiata qaffakkiartornerata nuna allamiut aningaasarpassuit ussernartorsiorfigalugit opiumimik naatitsisalernissaat aarleqqutigaara. Antonio Maria Costa oqarpoq.
Nangipporlu:
- Ikiaroornartumik akiuiniarnerput iluaqutaavoq. Ikiaroornartoq USA-mut Europamullu anngutinnginniassammat Laosimi, Columbiami Marokkomilu ikiaroornartuliorfiit ikuallattarpavut. Taassumalu saniatigut nunani ataasiakkaani pinerlittaalisitsisut ikiaroornartumik akiuiniartarput.
Ajoraluartumilli Europami kokainitortartut amerliartorput. Nunanilu taakkunani naalakkersuisut akuerinittutullusooq isikkoqarput. USA-mi pisimasut ilinniutiginngilaat. Ilinniarluarsimasut amerliartortut kokainimik atuisarput inuillu akornanni tamanna akuerineqartarpoq, Antonio Maria Costa oqarpoq.
- Nunani amerlasuuni ikiaroornartut assigiinngitsut sakkortussusai immikkoortillugit akiuiniartoqartarpoq. Akiuiniarnermi assigiinngisitsisoqanngitsuuppat nungusaanerput sukkanerussagaluarpoq. Naalakkersuinermik suliaqartut eqqarsaatissinniarlugit oqartariaqarpunga assigiimmik akiuiniannginnassi nammineq pisuuvusi taamatut artukkerneqarassi, Antonio Maria Costa naggasiivoq.
