Ikiaroornartumik tuniniaasut akileraartalerlik

Siunnersuut eqqumiiginarsinnaasoq taamaattoq Kattusseqatigiit Partiiata Inatsisartunut ilaasortaatitaata Jakob Skadep, aningaasanut inatsisissap pingajussaanneerneqarnerani tallimanngormat saqqummiukkaa, Sermitsiap nittartagaani allaaserineqarpoq.

- Hashimik eqqussisartut tuniniaasartullu iluanaarutigisartagaasa akileraaruteqartinneqalernissaat, Kattusseqatigiit Partiiata Naalakkersuisunut peqqissaartumik eqqarsaatigeqqullugu kajumissaarutigaa, Jakob Skade oqarpoq.

Politiit naatsorsuineri najoqqutaralugit Nunatsinni hashimik tuniniaasarneq millionilikkaanik niuerfiusarpoq aamma ilisimaneqareersutut tamanna inerteqqutaavoq. Aammami Inatsisartunut Naalakkkersuisunullu ilaasortat tamarmik Jakob Skadep siunnersuutaa ilalernartinngilaat.

Aningaasaqarnermut naalakkersuisup Palle Christiansenip siunnersuut ingerlaannavik itigartippaa, oqarluni hashimik niuernermit iluanaarutit Nunatta karsianut isaatitsissutaalersinnaanerat, Naalakkersuisut oqallisigisimanngisaannaraat:

- Siunnersuut Jakob Skadep nammineq akisussaaffigissavaa, Palle Christiansen Sermitsiamut taama erseqqissaavoq.