Ikiaroornartumik tuniniaasartoq tigusarineqartoq
- Angutip tigusarineqarnissaa ilimagiunnaavikkaluarparput, politeeq, Finn Jeppesen oqarpoq.
Angut 43-nik ukiulik Qaqortumi ikiaroornartumik eqqusseriarsimasutut ukiut pingasut ingerlanerini ujaarineqarpoq.
Amerikamiut angutit marluk Kalaallit Nunaannut ikiaroornartumik eqqussuisarsimallutik nassuerput, angullu 43-nik ukiulik tunuliaqutaalluni ikiaroornartumik tuniniaasartuusoq oqaatigaat. Angutip 43-nik ukiullip inigisaa Københavnimiittoq politiinit misissuiffigineqarmat angut USA-mut aallareersimavoq.
Politiillu angutip tigusarineqarnissaa qularileraluaraallu arnaq 21-nik ukiulik Narsarsuarmit Københaviniliartilluni aningaasarpassuarnik nassataqartoq tigusarineqarpoq.
- Arnaq tigusarineqartoq oqaluttuaraluarpoq aningaasat ilaquttaminit Qaqortuminngaanneersumit pissarsiarisimallugit, misissuinermili paasineqarpoq angut 43-nik ukiulik aningaasanik arnamut tunisisuusimasoq, Finn Jeppesen oqarpoq.
Angut qaammatini qulingiluani pineqaatissinneqarsimasunut inissiisarfimmiittussanngorpoq, 100.000 koruunillu arsaarinnissutigineqarlutik.
Arnarlu ukiuni marlunni pineqaatissinneqarpoq 10.000 koruuninillu akiligassinneqarluni.
