Ikiaroornartumik eqqussuineq akiornialerpaat
Danskit akileraartarnermut ministeriata Kristian Jensenip Nunattalu aningaasaqarnermut naalakkersuisuata Josef Motzfeldt nioqqutissat nakkutigineqarnerat pillugu isumaqatigiissuteqarsimaneq oqaloqatigiissutigaat.
Ikiaroornartunik hashimik heroinimillu anngiortumik eqqussuineq nunat taakku marluk akileraarnermut akitsuutinillu atortitsisuisa suleqatigiillutik nakkutigisussaavaat.
Suliniarneq malunnarnerusumik avammut nittarsaattariaqartoq ministerit isumaqarput.
Suleqatigiinnikkut ikiaroornartunik anngiortumik eqqussuisut kikkuuneri, suminngaaniillu pissarsiarisarneraat ajornannginnerusumik paasissutisseeqatigiinnikkut akiorniarneqassapput. Sakkortunerusumik nakkkutilliinikkut eqqussuineq unitsinniarneqassasoq Kristian Jensen oqarpoq. Danmarkimiit nassiussat misissornerisigut, inuillu Kastrupimi mittarfimmit Nunatsinnukalersut misissuiffiginerisigut nakkutillisoqassaaq.
Nioqqutissat eqqussorneqartut 99 %-ii Danmarkimeertarmata pissusissamisuuinnarpoq eqqussuinermi akileraarnermilu suleqatigiinnerulerneq, ualimut isumaqatigiissutip atsiornerani Josef Motzfeldt nuannaarluni oqarpoq.
Isumaqatigiissut ullut 30-t qaangiuppata atortinneqalissaaq, Danmarkimilu Akitsuusiinermi Akileraarnermilu Qullersaqarfiup suleriaasissap ilusissaa suliarereersimassavaa.
