Ikiaroornartumik eqqussiniaq tigusarineqarpoq
Maniitsumi politiit mittarfimmi tikittunik misissuinerminni angut 32-nik ukiulik ikiaroornartumik hashimik nassartoq ippassaq tigusarivaat. Hashit poortaaqqat kavaajaata qarliisalu kaasarfiiniittut mittarfimmi nassaarineqarput. Napparsimavimmi qinnguartaammik assiliinerup kingorna aamma paasineqarpoq, angut ikiaroornartunik iioraasimasoq.
- Ikiaroornartut hashit mikisunngorlugit iggavimmi nerisassiornermi atorneqartartunut plastfolianut poortorsimavai iiorarlugillu, Maniitsumi Politeeqarfimmi pisortaq Eigil Lyberth oqarpoq. Ikiaroornartorlu hashi timaaniittoq anginerpaaq usuup puuanut poortorneqarluni itianut mangunneqarsimasoq aamma nassaarineqarpoq. Ikiaroornartut hashit poortaaqqaniittut katillugit 80-it nassaarineqarput, taakkualu affaasa missaat iiorarneqarsimapput.
Angut 32-nik ukiulik siornatigut ikiaroornartumik nassartoq Danmarkimit Kangerlussuarmut tikinnermini tigusaanikuusoq, Maniitsumi politeeqarfimmi pisortaq Eigil Lyberth oqarpoq.
