Ikiaroornartulerisunik eqqartuussisoqaleruttorpoq
Ikiaroornartumik hashimik Kalaallit Nunaannut eqqussuisarsimanermut eqqusseriartarnermullu aamma tuniniaasarsimanermut misissuinersuaq ullumikkut nanginneqarpoq.
Unnerluussisuutitaasut pingasut ulloqeqqata siorna eqqartuussivimmiipput.
Oline Inuusuttoq Olsen eqqartuussivimmi ullaatungaali qulingiluanut malinnaavoq – Olina, qanormitaava ulloqeqqa siorna pisoqarpa?
- Nuup eqqartuussiviani eqqartuussisoqarpoq. Eqqartuunneqartut, illersuisut unnerluussisullu ataatsimoorlutik isaaleriarmata inip millinera maluginiaqqaarpara eqqartuussinerullu annertoorujussuartut misinnarluni. Angutit pingasut eqqartuunneqartut ikiaroornartumik eqqussuinermi tuniniaanermilu aqutsisutut taaneqarsinnaapput. Tamanna tunngavigalugu unnerluussisup piumasarivaa eqqartuunneqartup ataatsip ukiut tallimaata affaa isertitsivimmiittussanngorlugu eqqartuunneqarnissaa kiisalu suleqatigisimasai marluk ukiut sisamat affaanillu sivisussusilimmik isertitsivimmiinniissaat aamma piumasarivaa. Angutit eqqartuussaasut pisataat 3,8 million koruunit tungaanut nalillit arsaarinnissutigineqarsimapput eqqartuussinermilu tunngavissatut atorneqarlutik. Eqqartuussineq aallartimmat tunngavissatut uppernarsaatit saqqummiussorneqarput angutillu pingasut taakku qanoq suleqatigiittarsimaneri oqaluttuarineqarlutik. SMS-ikkut imminnut attaveqatigiittarsimapput; attaveqatigiinnerminnilu atitik allanngortittarsimavaat, hashilu allamik taaguusersorlugu aamma allaqatigiittarsimallutik. Aningaasat tunisaminnit qanoq avitseqatigiissutigisarsimagaat aamma saqqummiunneqarpoq. Aningaasat aningaaserivimmut ikineqartarsimanngillat allakkeriviillu aqqutigalugit nassiussuisoqartarsimavoq – ilaatigut 20.000 koruunit ataatsikkut nassiunneqarsimallutik. Ikiaroornartoq 3 kilop missaani oqimaassusilik nassiunneqarnermini tammaaneqarmat suleqatigiit taakku pingasut annertunerusumik paasisaarusunnginnamik imminiiginnarsimavaat. Ikiaroornartoq nassiunneqartoq ilumoortuusimanngitsoq aamma paasineqarsimavoq. Eqqartuunneqartut pingasut ikiaroornartumik eqqussuinermi tuniniaanermilu aallarterlaajunarat maluginiagassaavoq. Tamannalu tunngavigalugu aningaasat isertitarisartakkatik erseqqittumik atuisarnermikkut naggataatigut politiinit paasissaasimanerat aamma malunnarluni, Oline Inuusuttoq Olsen taama oqaluttuarpoq.
Taanna aperaarput ulluni marlunni eqqartuussisoqassanersoq, ima akivoq:
- Aap, aqagu inuit allat takunnissimasut suleqataasimasulluunniit isertinneqareerunik apersorneqassapput. Ullut marluk eqqartuussisoqassaaq, Oline Inuusuttoq Olsen toqqaannartumik paasissutissiilluni taama oqarpoq.
