Ikiaroornartulerisartussaq Akileraartarnermut Pisortaqarfiup qimmerissavaa
Ikiaroornartumik anngiortumik eqqusseriartarnerup akiorniarneqarneranut atatillugu, Ilulissani Akileraartarnermut Pisortaqarfiup akitsuusigassanik immikkoortortaqarfia ikiortitaangajalerpoq. Qimmeq Labradoi qaammatinik sisamanik utoqqaassusilik, Miki, Danmarkimi Fynip avannarpasissuani Morudimi sungiusarneqareerpoq, decembarilli qiteqqunnerani Ilulissiaanneqassaaq, ikiaroornartumik naamalluni Akileraartarnermut Pisortaqarfiup immikkoortortartaavani misissuisartunngussalluni.
Ikiaroornartumik naamallaqqissumik qimmeqarniaraanni, qimmeq qunuitsuusariaqarpoq, sapiitsuulluni alapernaatsuullunilu. Nipiliortoqartillugu uippalliassanngilaq, naammagittartuussaaq soorunalimi ilakkuminartuusariaqarluni, Mikip sungiusaasua, Torben Skovhus, aviisimut Nordfynimut oqaluttuarpoq.
Miki ilinniartikkuminartuuvoq, ikiaroornartumillu ujaasinissaanik ilinniartilereerpara, Torben Skovhus oqaluttuarpoq.
Hashimineq alersikumut ikillugu qimmimut naamatittarparput, ikiaroornartup tikka qanoq tipeqarnersoq sungiunniassammagu. Sungiusarnerilli ajornarsitikkiartuaassavavut, pikkorilluinnaqqissaaraangamilu soorunami nersualaarneqartassaaq, aamma tamulugassaanik mamartunik akilertassallugu, Torben Skovhus, avisimut oqaluttuarpoq.
Sisimiuni Nuummilu Akileraartarnermut Pisortaqarfiit immikkoortortassaat nutaat qanittukkut atulerpata qimminik ikiaroornartulerisartussanik tamaani aamma pisaartussaapput, Nuummi Akileraartarnermut Pisortaqarfimmi immikkoortortami pisortaq, Ferdinand Hammeken, oqarpoq.
