Ikiaroornartuerniat tigummigallagaapput

Naalagaaffeqatigiinnerup iluani politiit akornanni ikioqatigiilluni sivisungaatsiartumik misissuisoqareersorlu, inuit tallimat anngiortumik ikiaroornartunik nunatsinnut eqqussuillutillu tuniniaasarsimasut sapaatip-akunnerata naanerani tigusarineqarput.

Nunatsinni politimesterip Steen Thomsenip oqarnera malillugu ukiuni pingasuni kingullerni atorfeqarnermini anngiortumik ikiaroornartumik tuniniaanerit aaqqissuussat annersaasa ilaat taamaasilluni unitsinneqartoq.

Politiinit tigusarineqartut marluk Ilulissani najugaqartuupput, ataaseq Nuummi, ataaserlu Qaqortumi Københavnimilu aamma ataaseq tigusaasimapput, taama KNR avannaa oqaluttuarpoq.

Paasisagut malillugit tigusarineqartut marluk ilulissaneersuupput, Ilulissanilu imerniartarfimmik attartortoq tigusanut ilaavoq, taassumalu illua imerniartarfillu attartugaa ulluni kingullerni misissuiffigineqarsimapput, ikiaroornartunik nassaarnermik kingunilimmik.

Tigusaasoq alla nuummeersuulluni ataaseq Københavnimeersuuvoq, Qaqortumilu politiineersoq Mikael Kofod oqarpoq, politiit pingasut sulilluarnerisigut, sisamanngormat unnami tigusarinninnernut atatillugu, Qaqortumi ataaseq aamma tigusarineqarsimasoq.

Aamma Kangerlussuarmi politiit sisamat inunnik marlunnik tigusarinnissimapput.

Ilulissaneersut marluk Nuummeersorlu ataaseq matoqqasumik inissinneqarsimapput, taamatuttaaq Qaqortumeersoq Københavnimeersorlu ulluni 14-niniit qaammat ataaseq matoqqasumik tigummineqartussaapput, sukumiinerusumik misissuinerit ingerlanneqarneranni.

Anngiortumik ikiaroornartunik tuniniaasartut tigusarineqarsimaneranut tunngatillugu, unnugu Qanoruumi aamma sammineqassapput.