Ikiaroornartuerniat arfinilinnit amerlanerit tigusaassapput
Nunatsinni Danmarkimilu politiit suleqatigiinnerisigut inuit arfinillit ikiaroornartumut inatsimmik unioqqutitsisimasutut unnerluutigisassanngorlugit ippassaq ullaakkut tigusarineqarput.
Allattoq Mads Ullerup, Knud Reimer
juunip 15-at 2012 12:45
Suliaq suli ingerlanneqarmat, sulilu amerlanerusunik tigusarinnittoqarnissaa naatsorsuutigineqarmat, suliaq pillugu politiit oqaaseqaqqikkusunngikkallarput.
Finn Jeppesenip politiit ikiaroornartulerinermik immikkoortortaqarfianeersup KNR-imut tamanna uppernarsarpaa.
Ikiaroornartumut inatsimmik unioqqutitsisimasutut pasineqarlutik tigusarineqartut arfinillit Nuummeersuupput, Sisimiuneersuullutik aamma Københavnimeersuullutik.
Tunngaviusumik inatsisit najoqqutaralugu killisiuisoqareermat, tigusarineqartut marluk tigummigallagassanngortinneqarput, sinnerilu sisamat iperagaagallarlutik.
Finn Jeppesenip oqaatigaa, politiit sivisuumik suliaqareersullu tigusarinninnerit pisut, annerusumilli tassa oqaaseqarfigisinnaanngikkallarnerarlugu.
