Ikiaroornartuerniarsimanermut suliaq nangeqqippoq
“Annertuumik ikiaroornartuerniarsimanermut suliamut” atatillugu suliap ingerlateqqinneqarnera ippassaq nanginneqarpoq.
Eqqartuussinermi tusarnaartuusut paasivaat, eqqartuussivimmi salluneq oqaaseqarumannginnerluunniit iluaqutaanngitsut.
Ilisimannittoq pingaarneq, qaammatip ataatsip matuma siornagut, ilisimannittutut aperineqaraangami naatsorsuutigineqarsinnaanngitsutut imminut nalilertartup akiliisitaanissani naatsorsuutigissavaa:
- Akiligassiinerup angissusaa suliap ilungersunarneranut naleqqussarneqassaaq, unnerluussisut taama oqarput.
Tassami unnerluussisup ilisimannittoq pingaarneq, Qaqortumi pinerluuteqarsimasunut inissiisarfimmiittoq, politiit nalunaarutaannut eqqortumik oqalussimanera pillugu oqartissinnaanngilaa. Naak unnerluussisumit eqqartuussisumillu eqqortup oqaatiginissaanik pisussaaffeqarnera arlaleriarluni erseqqissarneqartaraluartoq, namminermi aamma eqqartuussaareermat.
Suliaq aqagu illersuisumit unnerluussisumillu ingerlanneqassaaq. Kisianni Nunatta Eqqartuussiviata aalajangiinera tallimanngorpamut utaqqisariaqassavarput.
