Ikiaroornartoq qineqqusaarnermi oqaluuserineqalerpoq
Nuummi arfininngormat qineqqusaarnermi Per Berthelsen ima oqarpoq:
-Ikiaroornartut pillugit oqallittoqangaatsiarsimavoq. Naalakkersuisullu siulittaasuattut piukkunnaatillit marluinnaammata taava taanna
ikiaroornartunik atuisuunnginnersoq Siumut sinnerlugu qulakkeerusuppara. Aamma paaserusupparput naalakkersuinermik suliallit qinerneqartut quuisa misissorneqartarnissaannut IA peqataajumanersoq, taama Per Berthelsen arfininngormat qineqqusaarnermi ukioq 2009-mi Siumukkormiutut oqarpoq.
2005-imili Per Berthelsenip suli Demokraatiniikkallarami qineqqusaarnermi ikiaroornartut pillugit pasilliinerit saqqummiunneqartannginnissaat akueriumanngilluinnarsimavaa. Tassami 2005-imi Lars-Emil Johansen Siumumeersoq qineqqusaarnermi tupaallatsitseqaaq, qinikkat naalakkersuinermik suliallit allat ikiaroornartumik atuisuusut pasilliutigigamiuk. Tamannalu tassa Demokraatip Per Berthelsenip nunusinnaajunnaarpaa.
- Isertortumik oqaaseqartarneq qunutuutut iliornerulluinnarpoq. Isumaqarpunga Lars-Emil Johansenip oqaaseqaatai minnerpaaffissap ataaniittut taakkualu peqataaffigiumanngilluinnakkatsinnut inissikkaatigut. Taavalu Demokraatit tungaannit taamatut qineqqusaarneq akuersaarsinnaanngilluinnarparput, taamatut Per Berthelsen 2005-imi oqarpoq.
Radioaviisip Per Berthelsen aperiumasimagaluarpaa 2009-mi qineqqusaarnermi matumani ikiaroornartumik atuisoqartarneranik sooq taama periataartigisumik pasilliuteqarnersoq. Radioaviisip aamma Per Berthelsen aperiumasimagaluarpaa nammineq oqaasii ”qunutuutut iliornerujunnaarlutik” ”minnerpaaffissap ataaniilersimanersut”. Per Berthelsenilli Radioaviisi oqaloqatigiumanngilaa.
Kuupik Kleist IA-meersoq aamma suliassaq pillugu immikkoortitaakkamik oqaaseqarumanngilaq, Radioaviisimulli oqarluni:
- Ajortisaarineq tamanna asuli oqalunneruvoq. Quup nutsalluunniit misissorneqarnissaat eqqarsaatigalugu taava Kalaallit Nunaat nunarsuarmi parlamenteqarfiussaaq taamatut ittunik misissuisitsisartoq, Kuupik Kleist oqarpoq, suliassarlu pillugu annertunerusumik oqaaseqarumanani.