Ikiaroornartoq naaggaarpaat
Timersoqatigiit kattuffianni ataatsimeersuartut isumaqatigiipput ikiaroornartoq akiorniarlugu suleqatigiinniarlutik.
- Nassuerutigisariaqarparput timersortartut akornanni hashimik ajornartorsiuteqartoqartarmat. Ilaatigut dopingimik misissuinermi hashimik atuisut paasineqartarput aammalu nunanut allanut unammisartut ilaat ikiaroornartumik eqqusseriarnikuullutik, timersoqatigiit kattuffianni siulittaasutut qinigaaqqittoq Nuka Kleemann KNR-imut taama oqarpoq.
Taamaammat isumaqatigiittoqarpoq nerrivimmi arsaarartartut kattuffiat akiuiniaqatigiinnissamik siunnersuuteqarmat qulequtserlugu "Ikiaroornartoq naaggaarlugu".
- Ilaatigut eqqartorparput nunanut allanut unammisartut atisaanni tamanna malunnartinniarlugu soorlu Arctic Winter Gamesimi aamma Island Games-imi peqataanermi. Tamannali pitinnagu unammersuartarnerni taakkunani allagartalersuisarnermut malittarisassat misissoqqaarneqassapput Tassani aamma Paarisap suleqatigineqarsinnaanera eqqartorparput, Nuka Kleemann oqarpoq.
Siulersuisunngortut suliakkinneqarput timersornerup ikiaroornartumut akiuiniarnermi periusissanik aalajangersaassasut tassani aamma eqqarsaatigineqarluni nunatsinni unammersuarnerni ikiaroornartumut akiuiniarnissaq.
Siulersuisunngortut tassaapput:
Siulittaasoq: Nuka Kleemann
Siulittaasup tullia: Finn Meinel
Siulersuisuini ilaasortat:
Ole Kielmann Hansen
Riikke Biilmann
John Thorsen
