Ikiaroornartoq illersopaat

Ikiaroornartup haship inerteqqutaajunnaarnissaa anguniarlugu, nunarsuaq tamakkerlugu ingerlaaqatigiinnerit ullumi ingerlanneqaqattaarput.

- Hashi inerteqqutaatillugu politikki iluaqutaanngilaq, atuisartuusugullu inupilunngortinneqartarnerput qatsupparput, Danmarkimi peqatigiiffiit ilaanni Socialistisk Ungdomsfrontimi ilaasortaq Jeppe Rohde oqarpoq. Hashimik anngiortumik tuniniaasarnermi Danmarkip naalagaaffittut akileraarutitigut annaasartagai eqqartorneqartunut ilaapput, aammalu haship napparsimasunut nipaallisaatitut iluaqutigineqartarnera eqqartorneqarluni.

Enhedslisteniimeersoq Lene Barfoed aammalu Radikalit inuusuttaaneersoq Zenia Stampe oqalugiartunut ilaapput.

- Inuup nammineerluni aalajangertussaatitaanera ataqqineqartariaqarpoq, tassami hashi imigassatut aalakoornartutuulli iinnarpoq. Inoqartarpoq imigassamik atuivallaartunik, soorlu aamma hashimik atuisartut ilaat taamaattartut. Aamma imigassamik atuisartut ilaqarput torersumik atuisunik, aamma hashimik atuisartut ilaat taamaattarput, Radikalit inuusuttaaneersoq Zenia Stampe Politikenimut oqarpoq.

Akerliussutsimik takutitsineq Danmarkimi ingerlanneqartoq Københavnimi Christianiamiit Blågårds-pladsimiillu aallartinneqarpoq.