Ikiaroornartoq ecstacy allallu akiorniarneqassapput

Ikiaroornartumik ecstacymik nunatsinnut qanittukkut eqqusseriartoqarpoq. Danmarkimi ilisimalikkat naapertorlugit ecstacy ikiaroornartunut allanut naleqqiulluni navianarluinnartuusoq paasineqarpoq, Danmarkimilu inuusuttunit arlalissuanngortunit maannamut toqqutigineqarsimavoq. Ecstacy nunatsinni pinaveersaartitsinikkut immikkut ittumik suliniarfigineqassanngilaq, taamaattorli ikiaroornartunik inuusuttut atuilinnginnissaat anguniarlugu ataatsimoorussamik sulianiartoqalersoq, Paarisami siunnersorti Poul Petersen oqarpoq.

- Ecstacy soorunalimi immikkut isigisariaqarpoq, tassa hashiminngarnit allaanerussuteqarlunilu navianarnerujussuummat, Qallunaat Nunaannillu paasisagut malillugit atuisut inuusuttuunerummata.

Taamaattumik pinaversaartitsinissaq inuusuttunut tulluussartussaassavarput.

Poul Petersen oqarpoq pinaveersaartitsinissamut atatillugu inuusuttut isumaat siunnersuutaallu tusarniarneqassasut. Pinaveersaartitsinissami inuusuttut atornerusaat sms-it internettilu atorluarniarneqarniarput.

- Ilisimavarput periutsit taakku Danmarkimi iluaqutaasartut.

Paarisa aanngajaarniutinut imigassamullu pinaveersaartitsiniarluni sulinermini massakkut nutaaliorniarpoq.

- Taskiliorpugut massakkut, atortussat assigiinngitsut tassaniipput. DVD-mik imaqarpoq, qarasaasiamut atortussanik aamma imaqarpoq, inuusuttunut tulluussagaanerusumik immersugaalluni. Sinerissami pitsaaliuinermut siunnersortit siullermik atussavaat tassanngaanniillu atuarfeqarfinnut assigisaannulli agguaanneqassaaq. Nassiutsinnaguli qanoq pitsaatiginersoq Paarisami soorunami aamma takoqqaassavarput.

Nunat avannarliit aanngajaarniutinik atornerluineq pillugu aggustimi ataatsimeersuassapput, tassanilu nunarput qaaqqusisuussaaq. Ataatsimeersuarnermi Kangerlussuarmi pisussami aanngajaarniutit pillugit ilisimasanik iliuusissanullu isumassarsianik nutaanik pissarsilluarnissartik Poul Petersenip naatsorsuutigaa. Ataatsimeersuarnermut katillutik 70-it peqataassapput.