Ikiaroornartoq 48 kiilu pillugu eqqartuunneqartoq

Angut 29-nik ukiulik ikiaroornartumik hashimik 48 kiilumik tigumminnissimasutut Nuup Eqqartuussiviani ullumi eqqartuunneqarpoq. Ikiaroornartoq Københavnimi qimuttuitsut unittarfissuanni kuffertinut toqqorsivinnut toqqorneqarsimasoq politiinit nassaarineqarpoq.

Unnerluussisup naliliinera naapertorlugu angut ikiaroornartumik nunatsinnut eqqussinissamik siunertaqarluni taamaasiorsimavoq. Taamatut naliliinerminut angutip aalisariutini ukiuni arlalinni suilisimanera tunngavilersuutigaa.

Akerlianilli illersuisup naliliinera naapertorlugu angut inuusuttoq ikiaroornartunik tuniniaasartunit atornerlunneqarsimavoq, taamaattumillu angutip ilisimasimanngikkaa ikiaroornartoq qanoq annertutigisoq angallassimanerlugu.

Angut eqqartuussivimmi nassuiaavoq ikiaroornartoq hashi Rødovremi inissiat ilaannut januaarimi 2011-mi aasimallugu, tassanilu kuffertinut marlunnut poortorsinnarlugu qimuttuitsut unittarfissuanni kuffertinut toqqorsivimmut toqqorsimallugu. Matuersaatit ikiaroornartunik tuniniaasartumut Christianiamiittumut tunniussimavai, kingornalu inuk taanna takoqqissimanagu eqqartuussivimmi nassuiaavoq.

Angutip politiinit ujaarineqalernerminiit qaammatit arlallit qaangiuttut politeeqarfimmut  imminut nalunaarutigivoq, nassuiaavoq ujaarineqarnini ilisimasimanagu.

Imminut nalunaarutiginini sioqqullugu angut ikiaroornartumik hashimik mikisumik tigummiartoq politiinit tigusarineqarpoq, kisianni ikinngutimi atia inuuialu atorlugit politiinit aninguivoq. Pinerluuteqarsimasunut allattuivimmut nalunaarsorneqarnissani ernumagigamiuk taamaaliorsimalluni eqqartuussivimmi nassuiaavoq.

Angutip nunatsinnut ikiaroornartumik hashimik eqqussinissani siunertarisimagaa unnerluussisumit uppernarsineqarsinnaasimanngitsoq eqqartuussisoq naliliivoq. Taamaattumik angut ukiuni marlunni pineqaatissinneqarsimasunut inissiisarfimmiittussanngorlugu eqqartuunneqarpoq.

Ukiuni sisamani pineqaatissinneqarsimasunut inissiisarfimmiittussanngorlugu eqqartuunneqarnissaannik unnerluussisup piumasaqaataa taamaasilluni itigartinneqarpoq.

Suliaq  Nunatta Eqqartuussivianut  ingerlatitseqqinniarlugu unnerluussisoq aalajangerpoq.