Ikerasammi inuit pingasut ujaarineqarput
Umiatsiaaraq inuttaqarani aquteralaa ingerlasoq nunaqarfiup Ikerasaap eqqaani ullaap tungaani nassaarineqarnerata kingorna inuit pingasut ujaarineqarput, Uummannami politiit nalunaarput.
Allattoq Jaaku Lyberth
Umiatsiaaraq Ikerasammit 500 meterinik ungasitsigisumi nassaarineqarpoq.
Umiatsiaaraq inuttaqarani motooria ingerlasoq
nassaarineqarpoq, Uummannami politiit pisortaat Taatsiaq Heilmann oqarpoq.
Umiatsiaaqqami ilaasut pingasut katataallutik immamut nakkarlutik ajunaarsimanissaat politiinit ilimagineqarpoq.
Qulimiguulik atorlugu politiit ulloq naallugu ujaasisimagaluarput, mannalu tikillugu nassaartoqarani, Uummannami politiit nalunaarput.
Sakkutuut sinerissami nakkutilliissutaat Knud Rasmussen Ikerasammut aqagu tikissaaq, ujaaseqataassalluni.
Ujaarineqartut ilaqutaat ujaasineq pillugu nalunaarfiginereerput.