Ikerasammi atuartut Danmarkimukassapput
Ikerasammi Ole Løvstrømip Atuarfiani klasselæreri, Betina Stegø, e-mailikkut allappoq, atuartut ukiut pingasut ingerlaneranni qallunaatut ima allallaqqitsigilerlutillu oqallorissisimatigisut Danmarkimi allaffigisartagarilersimasatik maanna tikeraarsinnaanngorlugit.
-Atuartut tamarmik nunaqarfimmiuupput, uagullu ukiut pingasut matuma siorna ilinniartitsisunngoriartorluta Ikerasammut tikikkatta, taakku tamarmik qallunaatut sapivissimapput, Betina Stegø oqarpoq.
Taanna aamma oqarpoq, Ikerasammi atuarfik atuarfinnut ingerlalluartunut ilaasoq, atuartullu Atuarfitsialammut iluarisimaarinilluinnartut.
Ikerasammi Ole Løvstrømip Atuarfia nunaqarfinni atuarfiit allat eqqarsaatigalugit tassaavoq ilinniartitsisutut ilinniarsimasunik ilinniartitsisugissaartoq. Ilinniartitsisuni arfiniliusuni tallimat iliniarsimasuupput.
Betina Stegø ilanngullugu oqarpoq, aningaasanik taama amerlatigisunik pissarsiorniarneq unammillernarsimasoq, aningaasaateqarfiit, aningaasaliisartut angajoqqaallu aningaasarpassuarnik katersuiniarnermi peqataasimallutik.
