IK: Atorfilittaq inatsit malillugu sulissaaq

Atorfilittaq inatsit malillugu sulisussaasoq, Ilinniagartuut Kattuffianni ASG-mi siulittaasoq Flemming Guntofte Nielsen erseqqissaavoq. Tamannalu pivoq, Aalisarnermut Piniarnermullu Pisortaqarfimmi pisortap ilassinnissutit pillugit maleruagassanik nalornissuteqarsimanera Danmarkimi aviisi ullormut saqqummersartup Politikkinip allaaserereeraalu.

- Soorunami inatsit sallersaavoq, taannalu tamanit aamma pisortatut atorfilinnit pinngitsoornani malinneqartussaavoq. Flemming Guntofte Nielsen taama oqarpoq.

Taamaattumik qullersarisaq qanorluunnit sulisuminut peqqusigaluarpat suna tamarmi inatsit malillugu pisussaasoq erseqqissaatigaa.

Ilassinnissutit maleruagassat malillugit atorneqarnerat minnerunngitsumillu aningaasanik matussutissaqarnerat uppernarsaasutut atsiorsimasut, matumani atorfilittat qulakkiigassaraat. Taamaattorli nalornissuteqartoqarsimanera takuneqarsinnaavoq,

Aalisarnermut Piniarnermullu Pisortaqarfimmi pisortap Amalie Jessenip Namminersornerullutik Oqartussat pisortaanerannut Kaj Kleistimut februaarimi allagarisimasaani. Amalie Jessen Danmarkimi aviisimi Politikenimi ima issuarneqarpoq: ”Inussiarnersisoqaleraluttuinnannguatsiarpoq allat qaarsillartinneqartarlutik nuannatsinneqartualerput, tamanna ingasaleraluttuinnarpoq” issuaaneq naavoq.

Kaj Kleistilli Amalie Jessen Naalakkersuisut kaajallaasitaannut taamaallaat innersuussussimavaa.

- Nalornissuteqaleraannili qullersarisamut, matumanilu qinikkamut erseqqissaasariaqarpoq, kukkusumik ingerlasoqalerneranik. Ilinniagartuut Kattuffianni siulittaasoq erseqqissaavoq.

Aammali ajorluinnartumik pisoqarsimappat tapersersortissarsiorluni kattuffigisaq saaffiginniffigineqarsinnaanerarpaa.

- Atorfilittalli qinigaq aamma tapersersugassaraa inatsisinillu atuiniarneranik ikiugassaralugu. Taamaattumik atorfilittap qulakkiigassaraa, suna tamarmi inatsit malillugu ingerlanissaa. Flemming Guntofte Nielsen nassuiaavoq.

Taamaattorli maleruagassat erseqqinnerusunngortinneqarnissaat atorfilittap aamma kissaatigisinnaavaa, taamaaliornikkut maleruagassat erseqqinngitsut assigiinngitsunillu paasineqarsinnaasut erseqqissarneqarnerisigut sulinermi maleruagassat erseqqinnerulerniassammata.

Namminersornerullutik Oqartussat pisortaanerat Kaj Kleist oqaaseqarumanngilaq, naalakkersuisut siulittaasuannut innersuussilluni. Naalakkersuisut siulittaasuat oqaaseqartinniaraluaratsigu iluatsinngilarput.