Iisartakkat nukkassaatitallit eqquteriarneqartut amerliartorput

Iisartakkat nukkassaatitallit allakkerivinni ukioq kingulleq arsaarinnissutigineqarsimasut 610-usimapput, arsaarinnissutigineqarsimasullu ukioq manna qaammatini siullerni marlunni 1000-it pallittareersimavaat.

Akileraartarnermut aqutsisoqarfik taama ilisimatitsivoq.

Iisartakkat nukkassarnermut qasujaallisarnermullu atatillugu atorneqartartut pakasaalluni misissuinikkut nassaarineqarput.

Iisartakkallu tamakku amerlanerusinnaanissaat akitsuuserisut ilimagaat.

Iisartakkat arsaarinnissutigineqartut allakkerisarfinni nassaarineqarput, timmisartoqarfinni umiarsualivinnilu arsaarinnissutaasimanatik.

Iisartakkat arsaarinnissutigineqarsimasut amerlisimanerat, Nuummi timigissartarfimmik Fit & Funimik piginnittup Allan Juhlip isumakulunnartoqartippaa:

- Tupaallannarpoq annertuseriarsimammat. Tassami qaammatit pingasut ingerlanerinnaanni taama amerlitigisimammata. Antidoping Greenland suleqatigalugu tamanna pinngitsoortinniarsaraarput. Fin & Fun ammarneqarmalli suleqatigiilerpugut. Misissuiniarlutik tamaanga takkuteriataartarput. Atornerluisumik pasitsaassaqarutta ikioqatigiilluta pinngitsoortinniartarparput, Nuummi timigissartarfimmik piginnittoq Allan Juhl oqarpoq.

Iisartakkanik nukkassaatitalinnik atuineq timimut ajoquseerujussuarsinnaavoq. Amerluttoqalersinnaavoq, tingullulertoqarsinnaavoq, puallarnarpoq, uummat unittoorsinnaavoq, aak kolesterolimik akoqarnerulersinnaavoq, soorlu aamma kinguaassiorsinnaajunnaartoqarsinnaalluni.