Iigartartup sukkanerulernera ilisimatuut misissorpaat
Ilulissat Kangerluani immap naqqata kissassusaa iigartartup sukkanerulerneranut pissutaava? Ilisimatuut tamanna paasiniarnialerpaat. Atuagassiami Nature Geoscience-imi taama allaaserinnittoqarpoq.
Allattoq Louise M. Kleemann
oktobarip 01-at 2008 09:51
- Iluliarsuit kangerluup paavani ikkarluttarput, naallu kangerlummi iluliaqarluaraluartoq immap naqqani imaq kissarnerulersarpoq, Mads Hvid Ribergaard, DMI-meersoq, atuagassiamilu allaaserinneqataasoq, oqarpoq.
Imaq kissarnerulaartoq kangerluup avataaniittoq 250 meteritut itissusilimmiippoq, imartarlu Ilulissat Kangerluaniittoq ilaatigut 350 meteritut ititigisinnaammat imaq kissarnerulaartoq taamaasilluni Ilulissap Kangerluanut isaalersarpoq, iigartartorlu sukkanerusumik ingerlaalersittarlugu, ilisimatuut eqqoriaapput.
- Iigartartup killinga ukiuni kingullerni qulini ilorparaluttuinnarpoq, iigartartorlu sukkatsikkaluttuinnarluni. Imartaq tamaaniittoq 1 gradimik aamma kissarnerulersimavoq, Mads Hvid Ribergaard oqarpoq.
