Igor-iuna nunatsinni anorersuartitsisoq

Kiattup anorersuarisimasaa Igor avannamut Davisip ikerasassuata tungaanut ingerlaarnermini nunatta sineriaata ilarujussuani anorersuartitsivoq.
Allattoq Najaaraq Egede
septembarip 23-at 2010 14:21

Silasiortut DMI-meersut Igor nalilerpaat, anorersuartut atorsarorusunngitsutut. Kap Verde-immi nalaaniinnermini orkanitut, tassa anorersuarujussuartut aallartippoq, Atlantikorsuaq qulaallugu avannamut Bermuda Akilinerlu nalleramigit sakkortussusia taannaajuarsimalluni.

Maanna Nunatta Kujataa angullugulu atorsaruumisimagunarpoq, tungaanulli sinerissap ilarujussuani anorersuarujussuartitsivoq.

Nuummi silasiutit nalunaarsugaat naapertorlugit ullaassaq anori sekuntimut 42 meterinik sukkassuseqarsimavoq, allaammi kangerluup qinnguaniittumi Kapisilinni anori sekuntimut 50,7 meterinik sukkassuseqarsimalluni.

Kujataani Narsarsuarmi mittarfimmi ippassaq unnukkut sekuntimut 30 meterinik anorlersoq anoraasuanerit sekuntimut 42 meteriusimapput. Paamiuni suli sakkortunerullutik sekuntimut 48 meteriusimapput. Paamiuni innuttaasut ilaannit ilisimatinneqarpugut, GTO-p illutoqaasa, maanna imarsiornermut ilinniarfimmut majuartarfissuit atasut tinginneqarsimasut, blokkini iigarsuit katagarsimasut illutoqqanilu qaliat ilaat teqqarsimasut.

Qaqortumi aamma anorersuaq anorersuarujussuartut sakkortutigisumik anoraasuartalik aamma sakkortusimaqaaq.

Anorersuup nunatsinni silaannakkut angallassinerup annersaanik ullumi unitsitsivoq.

Anorersuarujussuaq Igor silap kiatsinneranut aamma pissutaavoq, silasiutit malillugit unnuap ingerlanerani sila 16-18-illu akornanni kiassimavoq.

DMI-p nalunaarutai malillugit Igor Davissip kangerliumarngata kujasissuanut piguni atorsarussaaq.

Anorersuarujussuit kaavittuliortullu takkuttut qanoq ateqarnissaat ukiunut arlalinnut siumoortumik allattorsimaffeqarput. Arnat angutillu atii paarlakaattarput, naqinnerillu a-miit w-mut tulleriiaarlugit atserneqartarlutik. Anorersuarujussuup angutit atiata Igor-ip siuleraa arnap atia Hermine tullerissallugu Julia.