Igitsinip ministeriunera tunuarpoq

Akerliussutsimik takutitseqattaarsimasut, demokratiimik atuutsitsilerusuttut, Hosni Mubarakimik tapersersuisimasunik tunuaqqusinerisa kingorna naalakkersuisut taarserniarneqarput.

Igitsinimi sakkutuut naalakkersuisuutitaat maanna nalunaarput siornatigut assartuinermut ministeriusimasoq, Essam Sharaf, ministeriunertut toqqarneqartoq.

Sakkutuut qullersaqarfiata nalunaarutaa tunngavigalugu nutaarsiassaqartitsivik Ritzau taama ilisimatitsivoq.

Innuttaasut ulluni 18-ini annertuumik akerliussutsimik takutitseqattaareersullu, Mubarakip, 82-inik ukiullip, februaarip ulluisa aqqarnganni tunuartussanngorluni Ahmed Shafiq ministeriunertut toqqaraluarpaa. Taamani taamatut pisoqarnera arabiamiut nunaanni tamani aalassatsitseqaaq.

Musliminik qatanngutigiinnik taagortut allallu Igitsinimi politikkikkut suliniaqatigiiffiit Shafiq naalakkersuisuutitaalu tunuaqqullugit kaammattorsimavaat, ministerit sunniuteqartut tamarmik Mubarak naalakkersuisuugallarmat toqqarneqarnikuugamik, Mubarakip naalakkersuisuutitaattut isigineqarmata.

Mubarak ukiuni 30-ni naalakkersuisooreermat aqutseriaasaata qimalluinnarneqarnissaa suliniaqatigiiffiit piumasarisimavaat, allaffissornikkullu naalakkersuinermik ilisimasallit naalakkersuisuugallarnissaat ilaatigut siunnersuutigineqarsimalluni. Taakkualu ukiup naajartornerani qinersisoqarnissaata tungaanut naalakkersuisuunissaat kissaatigineqarluni.