Igitsinimiut 297-it toqoreerput
Toqutaasut amerlanerit Kairomi toqutaapput, ilaalli aamma illoqarfimmi Alexandriami toqutaallutik.
Human Rights Watchip Igitsinimi immikkoortortaqarfiani ilaasortat ilaata, Hebra Morayefip toqutaasut qassiuneri nalunaarsorsimavai. Nalunaarsugaani takuneqarsinnaapput Kairomi toqutaasut 232-simasut, Alexandriami toqutaasut 52-iullutik illoqarfimmilu Suezimi toqutaasut 13-usimallutik.
Toqutaasut amerlanerpaartaat januaarip ulluisa 28-anni aamma 29-anni toqutaapput. Taama pisoqarpoq illoqarfinni Kairomi aamma Alexandriami akerliussutsimik takutitsisut politiillu akornanni akersuuttoqarnerani.
Human Rights Watchip nittartagaani USA-miittumi, Hebra Morayef allappoq, toqutaasut nalunaarutigineqarsimanngitsut amerlagaatsiartuugunartut. Naalagaaffiit Peqatigiit aallartitaat aamma isumaqarput, eqqissiviilliortoqarnerani inuit 300-nik amerlanerit toqutaasimassasut.
Eqqissiviilliortoqarnerani inuit 3000-it aqqunarsimapput hundredelikkaallu tigusarineqarsimallutik.
Tahririp illoqannginnersaani inuit tusindilikkaat ullumi aamma katersuupput. Naalakkersuisut qanoq iliuuseqarnerisigut pissutsit ernumanarpallaarunnaarnerinit eqqoriaaqattaarnerit pigaluartut taamaattoq aqqusinerni inuit pisoq allatut oqaluttuarisutut ippaat. Danmarks Radiop Kairomi allaartitaata Michael S. Lundip, ullumi akerliussutsimik takutsitsineq ima oqaluttuaraa:
- Soorlu inuit maanga takkussuuttut ulluni siuliinut naleqqiullugit amerlanerusut. Akerliussutsimik takutitsisut ilaat misigisaqapilussimallutik oqaluttuarput. Angut inuusuttoq oqaloqartigisara oqarpoq politiinit tigusaasimalluni aammalu taakkunannga unatagaasimalluni. Taamaattorli oqarpoq tunniutiinnarniarani, ataasiinnarmi piumasaraa, tassalu Mubarakip naalakkersuisuujunnarnissaa.
Tahririp illoqannginnersaa maanna assiaqutserneqarsimavoq, tassugalu appakaanniartut tamarmik misissorneqartarput. Katersuuttarfiulli avataaniipput inuit 10.000-it tungaanut amerlassusillit utaqqisutullu pissuseqarlutik. Taamaakkaluartoq katersuuttarfiup eqqaaniittut niuertarfiit ulluinnarni pisartut assigalugit maanna ammarsimapput aammalu eqqissisimasoqarnera malugineqarsinnaalluni. Taamaakkaluartoq katersuuttarfiup ungasinngisaaniipput inuppassuit akerliussutsimik takutitsisut. Taama oqaluttuarpoq Michael S. Lund.
