Iginniarfiup eqqaani nunami ikuallannerit
Takunnissimasut oqaluttuarnerat malillugu ikuallatsisoqarsimavoq, taamaattumillu suliassaq politiinut ingerlateqqinneqarsimasoq annaassiniarnissamut upalungaarsimatitat pisortaat Johan Høegh Hansen oqarpoq.
Nuummi Politiini pingaartoq, Johan Vesten, KNR-imut oqarpoq, politiit angut ikuallatsissuusorineqartoq killisiorsimagaat.
- Ikumatitaliorsimalluni iluamillu qamissimanagu angutip nassuerutigaa. Pisoq piaarinaatsoornikut pisimavoq, mannali iluatsillugu inuit pinngortitami piffissami matumani innermik sissuerlutik atuinissaat erseqqissaassutigissavarput, Johan Vesten oqarpoq.
Angut pineqartoq akiligassinneqassagunarpoq.
Qaasuitsup Kommuniani annaassiniarnissamut upalungaarsimatitat erseqqissarpaat ikuallannerit nunamut eqqissisimatitamut, uumasunut, inunnut illunulluunniit ajornartorsiortitsinngimmata, taamaattumillu qatserinerit maanna ingerlanneqaratik.
Erseqqissaatigineqarporli pisut qanimut malinnaaffigineqartut.