Igasunngorniat iggarinneqqusaapput

Nunatsinni ingasunngorniat Narsami inuussutissalerinermut ilinniarfimmi Inuilimi iggarinneqqusaallutik unamminerat ullaaq aallartippoq. Iggersaartorsuit qanormita ingerlappat?

-Narsami inuussutissalerinermik ilinniarfik Inuili unamminissamut ima piareersarsimatigaaq soorluli nalliuttorsiornissarsuarmut pikisut, Judith Hard Peilmann unammisunut malinnaasoq oqaluttuarpoq.

Unammeqataavoq ingasunngorniatut Pituffimmi ilinniartoq Asii Gabrielsen. Taassuma unammeqataanini assut pingaartuunerarpaa, siunissami ingasunngornissaminut misilittagaqarfigilluassagini oqarpoq. Asii Gabrielsen sortebærmaizenaliornerani apersorneqarpoq.

Igasunngorniat unammissutigaat kapisililiorneq, kingulerassaalu. Igaat sapinngisamik nutta pissarititaanik marlunnik akoqassapput.

Iggersaartunut dommeri Maria Thorsdal oqarpoq unammineq ilinniartunut assut pissarsiaqaataasartoq.

- Imminut tatiginerat annertunerujussuanngortarpoq suliatillu soqutiginerulersarpaat nuannarinerulerlugillu.

Igasunngorniat unammineranni inuussutissalerinermik allatut ilinniartut, soorlu saqisunngorniat neriffissamik pinnersaatinneqarput.

Iggarinneqqusaannermi peqataasup siulliup igaavi tassa massakkut naammasereersimassapput, dommerinillu sisamanit nalilersorneqalerutorlutik. Iggarinneqqusaanneq ualeru pingasut missaanni naammassissaaq, ajugaasoq arfininngorpat unnukkut suaarutigineqassaaq.