- Suleqatigiilernerput isumalluarnarpoq, kujataanimi nerisassiat mamartut taamaasilluta siammarternerusinnaalissavagut. Maanna aallartippugut tunisassiaalerumaartussallu mamarunartorujussuussapput, Inunnguaq Hegelund oqarpoq. Toqqorsivimmit assi.Assi: Filip Gielda

Igasoq tusaamasaq savamik nerisassianik ineriikkanik nutaalioqataasoq

Igasup Inunnguaq Hegelundip Neqi A/S nerisassianik ineriikkanik ineriartortitseqatigisussanngorpaa.

Savamik nerisassiat piareeriikkat pisiniarfinni aappaagu pisiassaalissapput.

Neqi A/S igasoq Inunnguaq Hegelund suleqatigalugu nerisassianik ineriikkanik qerisunik nutaanik 2021 aallartinneranit tunisassiulissaaq.

- Savaaqqap neqaa arfininngornersiut suli tunisaalluarpoq, soorlu savaaqqamik pizzaliagut aamma tunisaalluartut. Misigisimavugulli suli iliuuseqarnerusinnaalluta, Neqi A/S-ip tunisassiorfiani pisortaq Ole Vestergaard oqarpoq.

- Pisiniarfinnimi nerisassanik ineriikkanik Danmarkimeersut nerisassiat qerisut arlallit tunisaapput. Nerisassianik taama ittunik nunatsinneersunik aamma peqalerpat iluarineqassasoq isumaqarpugut.

- Taamaattumik nunatsinni igasut pikkorinnerpaat ilaat nutaanik pisariitsunik nunatsinneersuniillu nerisassanik ineriartortitsinissamut isumaqatigiissuteqarfigisinnaagatsigu nuannaarutigaarput, Neqi A/S-ip tunisassiorfiani pisortaq Ole Vestergaard oqarpoq.

AAMMA ATUARUK Neqi A/S-ip kommuni aalajaatsunik sulisoqarnissamik suleqatigissagaa

Suliniut Neqip periusissiaanut, tassa suliffeqarfiup ingerlaavartumik ineriartornissaanut ilaavoq. Periusissiaq taanna Neqip anguniagaanut agguakkaniit pingasuniit ikorfartorneqarpoq, ukuusunit; tunisassiat perlukunit sanaat atorluarneqarnerussapput, nioqqutissiassat amerlanerulissapput kiisalu nioqqutissat pigeriikkat pitsanngorsarneqartuassapput.

Savaaqqamik, savamik tuttumillu spegepølsiliat aamma nioqqutaalissapput.

Inunnguaq Hegelundip Neqi A/S-ilu suleqatigiilernertik aamma nuannaarutigaa:

- Suleqatigiilernerput isumalluarnarpoq, kujataanimi nerisassiat mamartut taamaasilluta siammarternerusinnaalissavagut. Maanna aallartippugut tunisassiaalerumaartussallu mamarunartorujussuussapput, taanna oqarpoq.

Neqi A/S-ip aasaq manna ukiassaq ilanngullugu nerisassiassat nutaat inerisarnerannut misiliinernullu atussavaa, savanik toqoraaffiup aallartinnissaata tungaanut pissalluni. Nerisassiassallu ineriikkat nutaat ukiup nutaap aallartinnerani saqqummiunneqarnissaat pilersaarutaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat