Igasa Food Festival - Kujataamiut nerisassiaat

Pikialaartitsinermi ukiormanna immikkut sammineqartussat tassaapput savaatillit nuliartaasa nerisassiarisartagaat, aaqqissueqataasut ilaat Marie Toftdal, Inuussutissalerinermik ilinniarfimmi Inuilimeersoq nittartakkamut Sermitsiaq.AG-mut taama oqaluttuarpoq.

Nerisassiarneqartussallu ilaatigut tassaapput ruuat simersiat, rabarberinik marmeladeliat, rullepølset, paarnap issera naasullu panertitat. Tamatumanilu inuusunnerusut nutaanik eqqarsalersinnissaannut isumassarsiorfissaqartinnissaat siunertaasoq aamma oqaatigineqarpoq.
 
Savaatillit angutitaat aamma mamartuliaminnik sassaalliuteqassapput, soorlu assersuutigalugit savaaqqat neqaat nivingatillugit panertitat, uillut simersiat savaaraminerlu pujuugaq. Soorunami aamma qangaaniilli nerisassiarineqartartumik ussigassaqassaaq - tassalu iginneq.

AAMMA ATUARUK Campus Kujalleq nerisassanik 800-inik ukiulinnik sassaallerput

Nunatta avataa isumassarsiorfigineqartoq

- Spaniamiut pisarnerat malillugu saarullinnik tarajuinermik ilitsersuisussamik spaniamiunik tikisitsissaagut. Nanortalimmi aalisakkanik tarajortikkanik tunisassiat Spaniamut niuerutigineqartarput, taamaammat maanimiuusugut taakkuninnga iganissatsinnik aammalu nerisaqarnissatsinnik ilinniarnissarput pissusissamisoorpoq, Marie Toftdal Sermitsiaq.AG-mut taama oqarpoq.
 
Najukkami akunnittarfiit aamma peqataatinneqassapput. Taakku sassaalliutigisartakkamik saniatigut puisip kujaanik neqimillu saaneqanngitsumik allatut igallutik sassaalliuteqassapput. Akunnittarfiillu tamarmik taamaaliussamaarput.
 
Igasa Food Festival Nanortalimmi, Qaqortumi, Narsami, Narsarsuarmi Alluitsup Paanilu septembarip arfernanit ingerlanneqassaaq, igasullu, angerlarsimaffimmi ningiut meeqqallu nerisassiortinneqassallutik.

AAMMA ATUARUK Food Festival ingerlateqqinneqassaaq