Igalikumi isumaqatigiissut erseqqissaassutigineqarsimassagaluartoq

Nunarsuarmi aaqqiagiinngittarnerit eqqarsaatigalugit Igalikumi isumaqatigiissut qanoq isumaqarnersoq qanorlu sunniuteqassanersoq Kalaallit akunnerminni eqqartornerusariaqaraluaraat eqqisseqatigiinnissamik aaqqiagiinnginnernullu ilisimatusartoq Jan Øberg isumaqarpoq.

Igalikumi isumaqatigiissut Kuupik Kleistimit isigalugu pitsaaneroqqiffissaqanngitsup, kingusinaarlunilu avataanit ilisimatusartumit tikittumit kalaallit nunarsuarmiut eqqisseqatigiinnissaanut peqataannginneranik oqariartuuteqariartortoq akisussaaffimmik qimarratiginninnertut Kuupik Kleistip naliliinera eqqisseqatigiinnissamik aaqqiagiinnginnernullu ilisimatusartumit Jan Øbergimit tusaatissaannartut tiguneqarpoq.

Igalikumi isumaqatigiissutip qanoq isumaqarnera qanorlu sunniuteqarsinnaanersoq Kalaallinut erseqqissaatigineqartariaqaraluartoq Jan Øberg isumaqarpoq. Pituffimmi radarip nutarternissaa ataasinnguamilluunniit sorsunnissamut attuumassuteqanngitsoq Kuupik Kleistip allalluunniit innuttaasunut erseqqissaatigiisimassagaluaraat Jan Øberg aamma isumaqarpoq.

Amerikamiut peqqarniisaarniarnermik akiuiniarnermut tapertaliullugu teknologi atorlugu sorsoratarsinnaanermut sillimanissap aalajangersaaffigineranut Igalikumi isumaqatigiissut Jan Øbergip attuumanerarpaa.

Jan Øbergip aamma neriuutigaa Igalikumi isumaqatigiissummik atsiuisut ilisimalluinnarsimassagaat, siunissami atomip nukinga atorlugu sorsuleratarsinnaaneq suli pisinnaammat, ingammik amerikamiut sillimmartaarnerat eqqarsaatigalugu.

Jan Øberg isumaqanngilaq nunatsinniinnermini kalaallit qanoq iliortariaqarneranik oqaluttuussiartorluni, pissusissamisoorluinnarpaali Igalikumi isumaqatigiissutip nunarsuarmioqataaneq eqqarsaatigalugu qanoq isumaqarsinnaaneranik Kalaallit Nunaani innuttaasut erseqqissaaffigineqartariqaraluartut.

Eqqisseqatigiinnissamik aaqqiagiinnginnernullu ilisimatusartoq Jan Øbergi Nuummi ilinniarnertuunngorniarfimmi aamma oqalugiaateqassaaq.