Iffiugaq nutaaq iginermik akulik
Iffiat qangatut ikkunnaarput, iffiat assigiinngitsorpassuit nunani tamalaaneersut ilisimaleratsigik, iffiortarnikkullumi nutaaliortoqaqqammerpoq.
Canadap ilaani Paggivittammiut, tassa New Founlandimiut, iffiorsimapput. Iffiugaallu iffiassat akussaanik nalinginnaasunik akoqanngilaq, puisip orsuata iginneranik akoqarami.
Paggivittammiut iffialiaat puisip orsuata iginneranik akulik misileraalluni ineriartortinneqarsimavoq, puisit orsuinik immikkut ilisimatooq Dr. Cosmas Ho suleqatigalugu.
Oqaatigineqarpoq iginneq qajuusaasanngorlugu panertitaq iffiassanut akussiarineqarsimasoq, orsorsunninngivissorlu. Iginneq qajuusaasanngortitaq orsumik timimut peqqissaataalluartumik omega 3-imik akoqarluarmat peqqinnartuusoq oqaatigineqarpoq.
Paggivittammi, tassa New Foundlandimi, iffialiaq qajuusanik seqummarissunik seqummarluttunillu akoqarpoq, Paggivittammiullu taama tunisassiorsinnaanermik nassaarnertik assut isumalluarfigigaat, Norgemi nutaarsiassaqartitsivik Høge Nord tusarliussivoq.