Iffiortut akiliisitaasussanngorput

Savalimmiuni iffiortut tamangajalluinnarmik, tassa ataaseq taamaallaat minillugu, akinik anngiortumik isumaqatigiissuteqarsimanertik pissutigalugu, 45.000 koruunit tikillugit akiligassinneqarsimapput.

Iffiortorpaaluit akiligassamik akilernissaannut namminneq piumassutsiminnik siusinnerusukkut akuersisimapput, iffiortulli arfinillit akiligassatik 15.000 koruunit 38.000 koruunillu akornanniittut akilerumanngimmatigik Savalimmiuni eqqartuussivimmit taakku akiliisitaasussanngortitaapput. Iffiukkat minnerpaamik qanoq akeqarnissaat iffiortut namminneq akunnerminni isumaqatigiissutigisimammassuk eqqartuussivik akuliutsinneqarpoq.

Eqqartuussivik naapertorlugu unammilleqatigiinnermut inatsit unioqqotinneqarsimavoq. Iffiortut imminnut illersorniarsimagaluarput oqarlutik, unammilleqatigiinnermut inatsit nutaaq atuutsinneqalinngikkallarmat, iffiukkat qanoq akeqarnissaat ukiuni 70-ingajanni iffiortut namminneq aalajangersinnaasarsimagaat, taamali oqarnerat iluaqutaavallaanngilaq.

Savalimmiut kippasinnerusortaanni illoqarfeeqqami Sørvågimi iffiortoq ataaseq kisimi unnerluutigineqanngilaq akiligassinneqaranilu.