Timersortartut nersornaaserneqarput
Nersornaatit tunniunneqarput tassalu ukiup sungiusaasua ukiup aqutsisua aamma timersullammak.
Ukiup sungiusaasuatut toqqarneqarpoq, Birgitte Nielsen Nuummi utoqqaat timersoqatigiiffianni Qeersaani ukiuni arlaqalersuni sungiusaasoq.
Timersoqatigiinni ukiup aqutsisuatut nersornaaserneqarpoq, Jan Andreassen Tasiilaq. Jan Andreasssen Tasiilap timersortarfiani pisortaavoq, pisortaanermi saniatigut, sulorartunut, volleyballertartunut kiisalu qajartartunut suleqataavoq.
Ukiup timersullammaatut toqqarneqarpoq nerrivimmi arsaarartartoq Ivik Nielsen Sisimiut. Kalaallit Nunaanni nerrivimmi arsaartarnermi guldinnattarnermi saniatigut Danmarkimi nerrivimmi arsaarartartut pitsaanerpaat ilagaat.
- Kalaallit Nunaanni timersornermik pimoorussilluni ingerlatsisuuvoq, Kalaallit timersornermi angusatigut siuariartornerpaanut ilaalluni,
Nerrivimmi arsaarartut kattuffiat innersuussilluni taama allappoq.
Nersornaaserneqartunut ilaavoq assammik arsartartoq Akutaaneq Kreutzmann taanna Elite Sports Greenlandimit ukioq manna takutitsilluarnerpaatut maligassiuisutut toqqarneqarpoq. Ukioq manna assammik arsaannermi unammiffiusumi Akutaaneq Kreutzmann takutitsilluarsimavoq, klubbinilu Ribe-Esbjerg HH ilagulugu qallunaat håndboldligaanni pikkorinnerpaat sisamaani inississimallutik, Elite Sport Greenland Akutaaneq Kreutzmannip maligassiuisutut toqqarneqarnissaannut innersuussinermi taama allappoq.