Idlibimi qaartartut nakkaasut: Toqunikut ilivissaannik meeqqat assaasut

Inuit millionit decemberimili qimarngupput, ajornartorsiornerlu annertuseriapiloorpoq, ikiuniaqatigiiffiup Red Barnetip Syriami oqaaseqartartua Amjad Yamin Ritzaumut taama oqarpoq.

Yamin akersuuffiup qanittuaniippoq taassumalu oqaluttuaraa pisut ajornaarnersuartut ittuusut.

- Meeqqat oqaluttuaat alianartut tusartarpagut, ilaqutariillu annanniarlutik ilungersortarnerat pillugit oqaluttuaat. Pissutsillu ajornerujussuupput.

- Meeqqat ilaquttami toqutaanerata kingorna biilini atorunnaarnikuni najugaqartut. Nukappiaqqap Idlibimeersup atisani atukkani kisiisa atisarai. Nukappiaqqap arnaata atisat errormagit nukappiaraq akunnerni arfinilinni allarummiiginnartariaqarsimavoq, Amjad Yamin oqarpoq.

AAMMA ATUARUK Erdoganip Syriap avannaata tungaani saassussisoqarnissaa mianersoqqussutigigaa

- Qimaasut paatsiveerusimapput aamm tupaqqapput qanorlu iliussanerlutik naluaat.

- Atuarfiit qulit ullormi ataatsimi qaartartunik eqqorneqarunik inuit qimaaginnartariaqarput, taakkuali sumunnassappat Amjad Yamin taama aperivoq.

Red Barnetimit oqaatigineqartut naapertorlugit saassussisoqarnerani inuit 25-it toqutaapput.

Ikiuniaqatigiiffiit sapaatit akunnerni kingullerni qasseeriarlutik aarlerisaarutigaat, qimaasut ajornartorsiortorujussuunerat taakkua tupernik kiassimaarfissaminnillu amigaateqarmata.

Tyrkiami, Tysklandimi Frankrigemi Ruslandimilu aqutsisut pilersaarutaat naapertorlugit marsip ulluisa tallimaanni Syriami pissutsit pillugit ataatsimiissapput.

/ritzau/