Idle No More
Naak akerliuniarluni neriumajunnaarneq qaangiutereeraluartoq aamma naak naalakkersuisuni ilaasortat ilarpassui isumaqaraluartut pisut qaangiuttut, akerliuniarneq Idle No More-mik taagorneqartoq, kalaallisut taasinnaasarput Naammaleqaaq, suli ingerlarsorpoq.
Canadami sumi tamaani ullut tamaasa akerliuniartoqanngikkaangami isummanik nittarsaassisoqartarpoq, tassami naalakkersuisut neriorsuutiminnik puiguiinnannginnissaat indianerit qulakkeerusuppaat.
Soorlu nunarsuatsinni nunani allani ukiuni kingullerni mumisitsiffiusunisut, soorlu Araberit upernaarsiornerannik taagorneqartunisut, nittartakkani facebookimi tweeterimilu periarfissat atorlugit Canadami akerliuniarneq indianernit inuusuttunit siulersorneqarpoq.
Indianerit inuusuttut indianernut utoqqaanerusunut sanilliullutik ilalaannginnerupput. Taakkumi aningaasarsiornikkut pitsaanerusunik atugaqarusupput, pitsaanerusumik ilinniartitaarusullutik aamma Canadamiunut allanut naligiissitaarusullutik. Nunap inoqqaajunertik imaluunniit indianeriunertik piinnarlugu immikkoortitaajumajunnaarput.
Taama piumasaqarnerat nunarsuarmi sumi tamaani akisuanertut tusarneqarpoq, tassami facebook atorlugu ajornanngitsumik imaaliallaannarluni allanik attaveqartoqarsinnaammat.
Facebook-ikkut sumit tamaangaanniit tapersersuisoqarpoq. Hollandimit suliniaqatigiiffimmit Globalt Solidaritetimit tapersiisoqarluni, avatangiisinik illersuiniaqatigiinnit nunap immallu innarlerneqannginnissaa pillugu tapersiisunit, Gambiami eqqissinissamik suliniuteqartunit, Amerikami Kujallermi nunap inoqqaavinit, taakku oqaatigaat nunasiaateqarniat nunanik killilersueriaasii nunarsuarmi nutaaliaasumi inissaqanngitsut.
Tapersersuisut amerlaqaat, nunap inoqqaavi inuiaallu allat Australiameersut, New Zealandimeersut, USA-meersut aamma Nunatsinnit Idle No More Greenlandimik taallugu facebookikkut tapersiisoqarluni.
Taamaalilluni suliniaqatigiiffik Idle No More qanittukkut taamaatinneqarnavianngilaq. Canadami indianerit amerlaqisunit tapersersorneqartumik aallartitaqarput.
Idle No More-mik tapersersuisunut ullumi ulloq januaarip 28-at ulloritinneqarpoq. Ullorlu taanna malunnartinniarlugu Nuummeersoq Nuka-Alice Lund tapersersuilluni Amisuni silataani isummanik nittarsaassinermik aaqqissuussiniarpoq. Taassuma Canadami indianerit suliniutaannik tapersiilluni aaqqissuinermi qilaatinik nassartoqarnissaa kajumissaarutigaa.
