Ida Lohmann ingerlaqqippoq

TV2p erinarsornermik unammisitsinerani Voice-mi battle-imik taallugu erinarsortut marlukkaarlutik unamminerit siulleq ukiortaap ulluani pivoq. Ida Lohmann nipilersoqatigiinni Angussuarni erinarsortuusimasoq ingerlaqqippoq Mette Uhrnfeldt unammereerlugu.

Ida Lohmann Qeqertarsuarmiunik siuaasaqarpoq anaanagigalua Inger aamma Najaaqqamik taaneqartartoq tassani inunngortuummat. Idali nammineq Nunatsinni najugaqarsimanngisaannarpoq nipilersornerullu silarsuaani Danmarkimi peroriartorluni piffissap ilaa Athen-imi najugaqarsimalluni.

Maanna tassa Voice-mi ingerlaqqippoq Mette Uhrnfeldtillu ajorsarninni ajuallaatiginngivippaa.

- Unamminerup tamanna ilagiinnarpaa ingerlaqqikkuit illersoriartussaqqaarpakkit, Mette Uhrnfeldt unammereerlutik TV2p nittartagaani taama Ida Lohmann-imut oqarpoq.

Taamatullu oqarfigineqarnini Ida Lohmannip eqqissiallaatigeqaa.

- Kissaatigissagaluarparami marluulluta ingerlaqqinnissarput. Maannali tassa illersoriartussamaalerpaanga, Ida Lohmann oqarpoq.

Battle-nik taaneqartartunik unamminerit pingasut suli ingerlanneqartussaapput taakkulu kingorna toqqaannartumik aallakaatinneqartunik unamminerit tallimat aallakaatinneqassallutik. Tassani tv-mi isiginnaartut sunneeqataasinnaapput kikkut ingerlaqqinnissaannut.

Voice-mi unammineq februarip 22-at naggaserneqassaaq Danmarkimi erinaginnerpaatut taaneqartussaq nassaaarineqalerpat.