Kulturikkut nersornaat Ida Heinrichimut tunniunneqarpoq
Kultureqarnermut Ilageeqarnermullu Naalakkersuisup Vivian Motzfeldtip nersornaat aamma kajumissaat kulturikkut illorsuarmi Katuami ullaap tungaani aqqanermut tunniuppai
Naalakkersuisut kulturikkut Nersornaasiuttagaat operamik erinarsortartumut Ida Heinrichimut tunniunneqarpoq,
filmiliortartumullu Marc Fussing Rosbachimut Naalakkersuisut kajumissaatitut nersornaasiuttagaat tunniunneqarluni.
Kultureqarnermut Ilageeqarnermullu Naalakkersuisup Vivian Motzfeldtip kulturikkut nersornaat Ida Heinrichimut tunniukkamiut
ima oqaarpoq:
- Klassiskimik ilinniagaqarnini tunuliaqutigalugu nunatsinni erinarsornikkut kulturitta nutarteriffigineqarnera ineriartortinneqarneralu peqataaffigisimavaa. Inuit amerlasuut erinarsornermigut tuppallersarlugillu qiimmassartarpai. Tamatsinnullu ersarippoq erinarsorneq inuunermini ilisarnaataasa ilagilluinnaraat. Amerlasuunut maligassiuisuuvoq nunatsinnilu inuianni klassiskiusumik nipilersoriaatsimi sallersaalluni,
Kultureqarnermut Naalakkersuisoq Vivian Motzfeldt taama oqarpoq.
Naalakkersuisut kajumissaatitut nersornaasiuttagaat Marc Fussing Rosbachimut tunniunneqarmat Vivian Motzfeldt ima oqarpoq:
- 2017-imi nunatsinni filmi takorluukkanik imaqartoq siullerpaaq ”Akornatsinniittut - Tarratta nunaanni”-mik qulequtalik saqqummersippaa. Filmi namminiinnangajak suliarisani, manuskriptiliorlugu, ilitsersuisuuffigalugu, peqataaffigalugu, nipilersuusiorlugu, killorlugu tigussaasunillu misigisassanik immerlugu suliarisani. Takusassiisarnermi annertuumik piginnaaneqarpoq, aammalu teknikkimut tunngasuni assilissallu qanoq atornissaannut paasisimasaqarluarluni.
Naalakkersuisut Kajumissaatitut nersornaasiuttagaat 10.000 kr-nik aningaasartaqartoq 2016-mi pilersinneqarpoq. Taanna inuusuttumut piginnaasaqarluarumut tunninneqartarpoq.