Ida Heinrich Katuami erinarsussaaq
juunip 10-at 2005 16:45
Nunatsinni erinniarsuarnik operanik erinarsortartutut soraarummeeruteqartut siullersaat, operamik erinarsortartutut maajip sisamaanni soraarummeertoq Ida Heinrich Katuami unnugu tusarnaartitsissaaq.
Erinarsuutit 17-it atussavai, erinniarsuit tyskisut, italiamiusut, islandimiusut, franskisut, svenskisut russisullu. Soraarummeernerminit siullerpaamik nunatsinni taama tusarnaartitsissaminut pissanganerarpoq.
Københavnimi Nordatlantisk Bryggemi ippassaani aamma ingerlalluaqisumik tusarnaartitsisimavoq, maanilu tusarnaartitsereeruni Islandimut uteqqissalluni.
Ida Heinrichip karakteerini juunip naalernerani aatsaat tusassanerarpaa. Kingorna professionel opera sangeritut nunanut assigiinngitsunut qinnuteqaqattaassamaarpoq.
