ICES: Saarullinniartoqanngikkallarli
Pinngortitaleriffimmi biologit aalisagartassat pingaarnerit pillugit 2006-imut siunnersuinerisa eqikkarneqarnera saqqummiunneqarpoq.
Misissuisimanerit tunngavigalugit qaleralittassanik siunnersuuteqarnerup saniatigut kitaani Tunumilu saarulleqassuseq aamma ilanngunneqarpoq.
Sinerissap qanittuata avataani saarulleerukkiartornera 1990-imiilli pilerpoq, taamanerniillu sinerissamut qanittumi saarulleqassuseq eqqoqqissaartumik annertussusilerneqarsinnaasimanngilaq, taamaattorli saarulliit amerliartorusaartut oqaatigineqarluni.
Kitaani sinerissap qanittuani siorna 2004-imi saarullinniarnermi katillugit 5000 tonsit pisarineqarsimapput, Tunullu avataani 500 tonsinit annikinnerit pisarineqarsimallutik.
Imavinni misissuinerit pillugit nunat tamalaat siunnersuisartoqatigiiffiat ICES siunnersuivoq saarulliit amerlivitsinnagit 2007 sioqqullugu aalisartoqassanngikkallartoq, biologit saarulleqassutsimik misissuinerisa takutimmassuk, saarulliit amerlaqisut 2003-imi pinngortut 2007-imi angissusissaat aatsaat naammatsissasoq, taamaalillutillu iluanaarutaasunik aalisarneqarsinnaalissallutik.
