Icelandairip Jyllandimut timmisartuussisalernissaa marserneqassaaq
Ilaasut Danmarkiliartut taamaalillutik Københavnikkooqqaaratik Jyllandimukarsinnaanngussapput. Naak tamanna Air Greenlandimut unammillernertut nalilerneqarsinnaagaluartoq, Air Greenlandimit ernummatigineqanngilaq. Icelandairili Air Greenlandimit malinnaavigineqaqqissaarpoq:
- Malinnaasariaqassagunarpugut. Jyllandimummi timmisartuussinermi unammillerteqarsinnaassagunaratta, Air Greenlandip ussassaarinermi tuniniaanermilu pisortaa Christian Kjeldsen oqarpoq.
Air Greenlandip Keflavikimut timmisartuussisarnera taassuma eqqaasitsissutigaa, Keflavikiliartitsisarnerup nuannarineqarluarnera ilaatigut aamma taakkartorlugu.
Kalaallit Nunaanniit Jyllandimut ullumikkut timmisartuussisoqarneq ajorpoq. Ilaasut Jyllandiliarniartut Københavnikkooqqaartariaqassapput, qimuttuitsut, biilit, bussit timmisartulluunniit atorlugit Jyllandiliartarlutik.
Air Greenlandip ilaasuisa 10 procentiisa missaat Jyllandimut ingerlaqqittartut, Christian Kjeldsenip oqaatigaa. Icelandairip Jyllandimut timmisartuussisalerniarnera tamanna pillugu ernumanartortaqarpallaannginnerarpaa:
- Ilaasut Nunatsinniit Billundikkoorlugu Jyllandiliartut amerlavallaanngillat, Christian Kjeldsen oqarpoq, nangillunilu:
- Imaassinnaavoq ilaasut Billundikkoortartut amerlanerusut Aarhusimukartut Sønderborgimukartullu amerlaqutaalersinnaasut, kisianni Kalaallit Nunaanniit Billundikkoortartut ilaasorisartakkat 10 procentit missaanniiginnarput, Christian Kjeldsen oqarpoq.
Billundip illoqarfittaa illoqarfiullu eqqaamiui eqqarsaatigalugit Jyllandiliartitsisarnissamut periarfissat annertupput, Jyllandiliartitsisalernissamillu Air Greenland pilersaaruteqarnersoq, Christian Kjeldsen aperaarput, akivorlu:
- Tamanna pillugu oqaaseqarsinnaanngikkallarpunga, Air Greenlandip ussassaarinermi pisortaa Christian Kjeldsen naggasiivoq.
Keflavikimiit Billundimut utimullu sapaatip-akunnerata ingerlanerani pingasoriarluni timmisartuussisarnissani, Icelandairip pilersaarutigaa, juunip aallaqqaataaniit septembarip aqqaneq-aappaata tungaanut, ataasinngornermi, pingasunngornermi arfininngornermilu timmisartuussisoqartassalluni.
