Ice Cold Goldimik isiginnaagassiortut Nunatsinnut uterput
![](/sites/default/files/styles/image_934x467/public/article_images/david_casey_ice_cold_gold.jpg?itok=0ZZZowTN)
- Kalaallit Nunaanni misigisassat suunersut paaserusukkukkit maanngarlutit aatsaat misigisinnaavatit. Kalaallit Nunaat nunarsuarmi nunani nuannernerpaajugunarpoq. Nuna tupinnaannartoq, Ice Cold Goldimi peqataasut nersualaarinninnermini ilaatigut oqaatigaat.
Ice Cold Goldimi immikkoortut ilaat, isiginnaagassiamik suliarinnittup David Caseyp qarasaasiami takutippai. Taanna isiginnaagassiamik suliarinnittunik aqutsisuuvoq, kuultisiortullu Amerikamiut taakku ukioq manna suliassaat suussanersut, taassuma oqaluttuaraa:
- Kuultisiortut siornamut naleqqiullugu ukioq manna sulinerminni angumerisassaat amerlanerupput. Tikitassat amerlanerupput, ungasinnerusumiillutillu, David Casey oqarpoq.
Kuultisiortut taakku septembarip qiteqqunnissaata tungaanut Nunatsinniissamaarput, Kujataaniissallutik, soorlu aamma Qeqertarsuup Tunuani aatsitassarsiussamaartut. Siornamut naleqqiullugu angumerisassarpassuit:
- Ungasissumut angalasassaagut, assersuutigalugulu piniartup kisimiilluni angalaneranut sanilliullugu naammassisassat amerlanerujussuussallutik, inuimmi 30-nit amerlanerusut peqataassapput, David Casey opqarpoq.
Kalaallit Nunaanni ullutsinni inuuneq, Nunarsuarmioqataanermut naleqqussagaq, David Caseyp oqaluttuariniarpaa:
- Nunarsuarmi nunani alianaannersaat taamaaliornikkkut takutinniarsaraara, David Casey, nersualaarinninnermini oqaatigaa.
Isiginnaagassiaq Ice Cold Gold, USA-mi aallakaatinneqarmat nuannarineqarsimaqisoq, taassuma oqaatigaa, tassami inuit 15-it millionit missaat Ice Cold Gold isiginnaarsimammassuk:
- Kalaallit Nunaat pillugu, kalaallillu kulturiat pillugu annertunerunerusumik paasisaqarusuttoqarnera, isiginnaassiornitsinni paasivarput, Ice Cold Goldimik suliarinnittoq David Casey oqarpoq.
Ice Cold Goldip Discovery Channelikkut ukiup pingajussaanik aallakaatinneqarsinnaanissaa, David Caseyp neriuutigaa, isiginnaartartulli matumani apeqqutaassangatinnerarlugit.
Discovery Channel pigigukku, taava Ice Cold Goldip ukiumi siullermi aallakaatinneqarnerani immikkoortut pingajuat unnugu nalunaaqutaq arfineq-pingasunut aallakaatinneqarnera takusinnaassavat.
Ice Cold Gold, Discovery Channel Danmarkimi aallakaatinneqartartut nuannarineqarnerpaat tallimat akornanni inissisimasoq, Discovery Danmarkip oqaatigaa.