ICC: Uran pillugu paasititsiniaasoqartarniarli

- Silaannaap kissatsinneranit Issittoq eqqorneqaannartoq aatsitassarsiortut aamma ilanngullugit silaarutsissimagunarpai, taamaattumik inuinnaat pisunik nakkutiginninnissaat pisariaqarluinnarpoq, soorlu Finn Lynge aamma Earth Charter Narsami ajunngitsumik malitassaasumillu iliortut. Tassami aatsitassarsiorniat pisortallu illuinnaasiortumik ilisimatitsisarnerat pinngitsoorani illuatungilertariqarpoq. Taamaattumik uranisiornerup qanoq navianartigineranik inunnut avatangiisinullu qaammarsaanissaq pisariaqarpoq, ICC-ip siulittaasua tusagassiuutinut allappoq.

Aqqaluk Lyngep tikkuarpaa, pingaarnerpaasoq ilisimassallugu Danmarkip naalagaaffiata Naalagaaffiit Peqatigiit aqqutigalugit aalajangersaaqataaffigisimasai Kalaallit Nunaanni aamma malinniartussaagatsigik, Narsamilu pisoq assersuutissaqqinnerarpaa, Kalaallit Nunaanni ullutsinni pisussaaffik ingalassimaneqarmat.

Taamaattumik Kalaallit Nunaanni politikerit pinngitsooratik akisussaaffigaat avatangiisit pillugit naliliisarfik innuttaasut Kalaallit Nunaanni illuinnaasiunngitsumik ilisimatinneqartarnissaannik qulakkeerinnittussaq pilersissallugu.