ICC Tjukotkami nalliuttorsiorput
Ruslandimi Inuit naggueqatigut, ICC-mit tikeraat tikilluaqqulluaraat, Aqqaluk Lynge-p oqaatigaa.
- Tupinnarpoq taama tikilluaqqusaalluni inussiarnisaarfigineqarlunilu. Kingullermik 2001-mi maannga tikeraarpugut, Roman Abramovich Tjukotkami taamani guvenøriulluni qaaqqusimmat. Maanna maaniinnerput immikkut illuinnarpoq nuannaarnarlunilu, Aqqaluk Lynge oqarpoq.
Tjukotkami inuit najugaqartut katillugit 50.000-it missaanniipput taakkunannga Inuit naggueqatigut 1600 missaanniillutik.
Tjukotkamut kingullermik tikeraarneq eqqarsaatigalugu Inuit akornanni siuarsimaneq maanna ersarinnerulersimasoq Aqqaluk Lynge oqaatigaa.
- Siuarsimaneq, imminut tatigineq siunissamullu ammasumik eqqartueqatigiissinnaaneq aammalu ajornartorsiutit pillugit eqqartueqatigiissinnaaneq atuutilersimapput. Tamanna nuannaarutigaarput pingaartorsiutigalugulu.
ICC-mi siulersuisut Tjukotkamiinnerminni atsioqatigiissuteqarput kikkunnut tamanut pingaaruteqarluartunik.
- Guvernøri, Valentinovitch ullut marluk matuma siorna suleqatigiinnissaq pillugu atsioqatigaara. Aamma guvernøriusimasup Abramovichip nalaani atsioqatigiissutigisimasarput nutarterneqassasoq isumaqatigiissutigaarput, tassalu nunat inoqqaavisa kattufiiat nutarterneqqassasoq isumaqatigiissutigalugitigu, tassalu taannarpiaq 2018-mi Tjukotkami ICC-p ataatsimiinnissaanut tikkuussisuusussaassaaq.
Aqqaluk Lynge-p saniatigut, Tjukotkamut tikeraat Nunatsinneersut ilagaat, Carl Christian Olsen, Hjalmar Dahl, Rena Skifte aamma Alfred Jakobsen.