ICC: Sumiiffiit illersukkat qimassigit!
Amerikamiut suliffeqarfiutaata GXT-ip immap iluanik sajutsitsilluni misissuinisssamik qinnuteqaataanut atatillugu tusarniaanerit qaammammi uani naammasseqqammerput, pilersaarutillu tamarmik malinneqarpata GXT Tunup Avannaani imartani immap iluanik sajutsitsillutik misissuinitik aasaq manna aallartissavaat.
ICC-li maanna unikaallaqqusivoq. Tassami tamanna illersugassatut immikkoortitaavoq, taamaaliornissarlu pissutissaqarluartoq, ICC isumqarpoq.
Sumiiffimmi illersugaasumi misissuinermi suna siunertaava? Oqaraanni sumiiffiup illersugaanissaa peqquteqartoq - tassalumi immami miluumasuut illersorniarlugit taamaappoq - taava sooq immap iluanik sajutsitsilluni misissuisoqassava?
Nalunanngilarmi, suliffeqarfiit GXT-tut ittut uuliamik gassimillu qallussallugu soqutiginartunik nassaarumallutik immap naqqanik misissuisut, paasissutissallu pigilikkatik uuliasiortitseqatigiinnut tunerusussagaat, Parnuna Egede, biologiusoq ICC-milu avatangiisit pillugit siunnersortasoq, oqarpoq.
ICC-p paasiuminaatsippaa, sumiiffinni, biologit illersugassatut immikkoortitaanni, immap iluanik sajutsitsilluni misissuisoqarniarmat:
- Pinngortitaleriffik aamma Danmarkimi avatangiisinik misissuisoqarfik, DMU, sumiiffinnik nalunaarsuinikuuvoq, qilalukkanut qerneranut, aavernut immamilu miluumasunut allanut nunatsinnut pingaaruteqartunut illersuiffissanik.
Sumiiffiillu illersugaasut taakkua miluumasunut taakkununnga pingaaruteqartutut tikkuarneqarnikuupput. Sumiiffinnik, immami miluumasunut tamakkununnga illersuiffissanik, pilersitsineq ICC-ip isumaqanngitsutut isigaa, sumiiffinni tamakkunani immap iluanik sajutsitsilluni misissuinikkut akornusersuinissaq akuersissutigineqartassappat.
Sumiiffiit illersugassat tassaapput imartat misikkarissut
Illoqqortoormiut avataaniit avannaarsuani Kronprins Christians Landip avataa ilanngullugu, taakkununnga ilaallutik Danmarkshavnip Daneborgillu avataat, qilalukkat qernertat aarrillu najortagaat.
DMU malittarisassaai naapertorlugit, tamakkunani immap iluanik sajutsitsinissaq inassutigineqanngilaq, taamaattoqassappalluunniit amerlanngitsuinnarnik sajutsitsisoqarsinnaalluni.
Amerikamiut suliffeqarfiutaat GXT Nunatsinni ukiuni kingullerni marlunni immap iluanik sajutsitsillutik misissuisarput. Uuliasiorluni misissuinerit sioqqullugit misissuinerit taamaattut ingerlanneqartarput.
Aammami GXT-ip avatangiisinut sunniutaasussat pillugit naliliinermini nassuerutigaa, sumiiffinnut illersugaasunut taakkununnga aamma piumaarlutik, GXT-mili isumaqarput, arferit immamilu miluumasut allat misissuinernit sunnerneqangaassanngitsut.
Kisianni taama oqassalluni akikippallaartoq, ICC isumaqarpoq.
Taama inerniliitigani annerujussuarmik ilisimasaqarnissaq pisariartoq, ICC isumaqarpoq:
- Nipit nunatta imartaanmi qanoq pissuseqartarnersut suli misissorneqartinnagit, arfernut kigutilinnut soqqalinnullu qanoq sunniuteqartarnersut oqaatigineqarsinaanngilaq. Tamannalu uagut ajortutut isigaarpoq. Uagut isumaqarpugut, suliffeqarfiit misissuisitsisariaqartut, immap iluanik sajutsitsinikkut nipit issittup imartaani qanoq pissuseqartarnersut paasiniarlugu.Taava tamakkua paasigunikkit avatangiisinut sunniutaasinnaasut pillugit naliliinerminni atorlugit, maannakkummi taamaaliorneq ajorput, ICC-meersoq Parnuuna Egede oqarpoq.
Danmarkimi avatangiisinik misissuisoqarfik, DMU, siunnersuuteqarpoq, immami miluumasut pillugit ilisimasat amerliartortillugit sumiiffiit illersugaasut immaqa allaat annertusarneqarsinnaasut.
