ICC pillugu ilisimanngisatit

Ataatsimeeqataasut ilaat nilissaqarpoq allallu qaamalaartunik nujaqarnini tanngassimaarutigaa, allap siulersuisuni ilaasortanngorlaap nipimik misiliisoqartussaammat ataatsimiittut qimattariaqarpai.
juulip 02-at 2010 10:16

ICC-mi oqalugiartunut tunniussaqartarneq ileqquuvoq. Ataatsimeersuarnerup nalaani sualuppassuit oqalugiaqqammersunut isaanneqartarput tunniussallu ilaat isumaqartinneqartaripput. Soorlu EU-mut puisit amiinik eqqusseqqusinnginneq pinerullugu EU-p aallartitaa, Nicholas Hanley, puisip amianik tunineqarpoq aatsitassaqarnermullu naalakkersuisoq, Ove Karl Berthelsen, Issittumi uuliasiorluni qillerinissani sillimaniarnerup pitsaanerujussua pillugu oqalugiareersorlu qillerissutip assinganik tunineqartoq.

Siulersuisuni ilaasortanngorlaaq, Hjalmar Dahl, ataatsimiinneq sisamanngormat qimakkallalaartariaqarpaa nipilersoqatigiinni Sume-kkunni tumerpaarpaartuugami nipimik misiliisoqartussaammat ornillugit. Sume sisamanngornermi unnukkut naggataarnersiornermi nipilersorput.

Canadamit aallartitaq, Duane Smith, oqalugiarnermini oqarpoq timimini akoorutissanik uninngasoqarpallaartoq misissortinnermini paasisimallugu. Taamaamma neqitorpallaarunnaarluni eertanik qillertuusarmiunik nerinerulerniarpoq. Ataatsimeeqataasut ilaata qinngasaavalullugu illerpaa oqarluni maanna ulluni arlalinngortuni Duane Smith-ip silaannaq aniatitaa naamasarsimagamiuk nammineq eertanik nillaanartunik taama amerlatigisunik atorfissaqartitsilerunnarnani.

ICC-p siulittaasuata, James "Jimmy" Stotts-ip, nunatsinnilu ICC-p præsidentiata, Aqqaluk Lynge-p, qeersaalersimanertik arlaleriarlutik quiasaarutigisarpaat, naamigooq taamani ICC aallartikkamikku. Taama oqarnerat pillugu Mary Simon Canadamiuusoq Inuit Tapiriit Kanatami-lu siulittaasuusoq imminut qaamasunik nujaqarnerarpoq.

Pissangasoqaleruttortuli ippassaq pujaattoortinneqarput. Ersaattaanneqaqisunik arlaleriarluni qinersisoqareertorlu 2014-imi ICC-p Canadami ataatsimiiffissaa oqaatigineqartussanngorpoq. Nipaannersuaqarpoq Mary Simon-ilu aperineqarpoq: ”Ataatsimeersuarnerlu pissaaq? ……”Øhm, suli aalajanginngilarput, kingorna uterfigisariaqassavarput”, akivoq. Tusarnaartut akunnattoortoqannginnissaa pinerugunarlugu ersaattaaterujussuaannarput.

Finn Lynge nunatsinneersoq ICC oqalugiarnermini isiginnaartuuinnarnerarpaa issittormiullu soqutigisaat suliniaqatigiinnut akuullutik iluaniit sorsuutiginngimmassuk naammangittaalliuutigaa. Aqqaluk Lynge-p akillugu oqalugiarnermini Finni ICC-mut akulerulluarsimammat qutsavigaaa.

Finn Lynge oqalugiarnermini aamma oqarpoq nunatsinni ”No left left” (tassa saamerleeruttoq, aaqq.), tassa nunatsinni partiit saamerliunerpaartaat, IA, maanna naalakkersuisooqateqarmat, taakkualu Qeqertarsuup avataani uuliasiorluni misiliilluni qillerinissat akuerisimammatigik.