ICC-p siulittaasua Aqqaluk Lynge The Economistip qaaqqusaatut ullumi Oslomiippoq
Ullumi atatsimiinnermi eqqartorneqartut tunulequtaraat Issittumi pissutsit allanngoriartupiloornerat, pingaartumik nunarsuarmi silap pissusiata allanngoriartorneratigut Issittumi politikkikkut ingerlaaseq sunnersimammagu pingaartumik Issittup pisuussutaanik pilerngutilernerup kingunerisaanik. Oslomi ataatsimiinnermi immikkut ilisimasalippassuit oqallisigivaat isumalluutinik atuineq, aatsitaassarsiorneq, uuliasiornerlu, tamatumalu Issittumi aningaasarsiornikkut sunniutissai kiisalu avatangiisinut inunnullu tamatuma qanoq sunniuteqarsinnaanera.
Inuit Issittormiut Siunnersuisoqarfiata, ICC-p siulittaasua Aqqaluk Lynge, ullumi ataatsimiinnermi saqqummeeqquneqarsimavoq naggueqatigiit Inuit Alaskami Tjukotkami Canadami Nunatsinnilu aatsitassarsiornermi uuliasiornermilu ingerlaaseq qanoq politikkikkut sunniuteqarnersoq aammalu inuit sulianut unamminaqisunut namminneq akuunerminni qanoq nunaminni iluaquteqarniarnersut aningaasarsiornikkut imminnut napatissinnaalerumallutik, naalakkersuinikkullu kiffaanngissuseqarneq annertusarumallugu.
Aqqaluk Lynge ukiorpassuit nammineq nunatsinni Inatsisartunut ilaasortaasimasup ullormi qinersiviusumi nunatsinniinnginnini eqqumiitsumik misigisimanerarpaa. Oqarporli ullumerpiaq demokratip ulluisa pingaarnerpaartaani aaliangiisussat tassaasut qinersisartut. Qinersisinnaatitaaneq pisinnaatitaaffiit pingaarnersaasut ilagaat qanortoq atorluarnarisiuk qinersiartukaallusilu. Oslo-miit Aqqaluk Lynge nalunaarpoq oqarlunilu nammineq aallannginnermini allakkatigut taasereersimalluni.
