Assi: Ken Bower

ICC-p piniartullu saliinissaq nuannaarutigaat

Sakkutooqarfiusimasuni eqqakkanik piianissamut saliinissamullu isumaqatigiissusiorneq Inuit Issittormiut Siunnersuisoqatigiiffianit ICC-mit piniartumillu nuannaarutigineqarpoq.

Amerikamiut sakkutooqarfigisimasaanni salitassat tulleriiaanneqaqqaassapput, tamannalu ICC-p pitsaalluinnartuusoraa:

- Oqaatigisariaqarpoq isumaqatigiissut nuannaarutissaasoq, minnerunngitsumik nunatsinni tamarmi, ICC-p nunatsinni siulittaasua Hjalmar Dahl taama oqarpoq.

Nunatsinnimi sakkutuut qimataannik saliinissaq sivisuumik oqallisaareerpoq, maannalu iliuuseqarfigineqalerluni.

- Taamaattumik una ammaassineq alloriarnertut uagut tungitsinniit taasariaqarparput, Kisianni nunatsinnit Danmarkimiillu nakkutilliisuutitat saliiffiusussat aalajangertassavaat. Tassa sumi, qaqugu qanorlu suliarineqassanersut taakkunanit aalajangerneqartassaaq.

Tasiilap eqqaaniittoq Ikkatteq aamma Nuup kujataaniittoq Marraq toqqarneqarsinnaasutut taaneqarput.

AAMMA ATUARUK Sakkutooqarfiusimasut salinneqarnissaannut immikkoortinneqartut amerlineqartut

Ikkattilli qaqugu salinneqarnissaa nalunaraluartoq, siunnersuummi ilaatinneqarnera piniartup Kuummiuneersup nuannaarutigaa.

- Isumaqarpunga sakkutooqarfikut ilaata, tassa Ikkattip, eqqartorneqarnera ajunngilluinnartoq, Piniartoq Anders Sanimuinnaq taama oqarpoq.

Taamaakkaluartorli Ikkattip salinneqarnissaa neriuutigaa. Piniartummi, maanna 54-inik ukioqartup, inuusuttuaraallunili piniartoqatinilu Ikkatteq upernaakkut uillunik imanerniarfigisarpaat.

Eqqakkalli pinngortitaq alianaatsuusussaq takussunarsisippaat.

- Nappartakut manngertornertut,timmisartup illukuata saviminertaata ilaa uppissimasoq taavalu aamma biilikut kranikullu. Takussunartorujussuupput, Mingutsitsisulli, tassa USA, kalaallit danskillu isumaqatigiissutaanni peqataatinneqannginnera uggornartoq, ICC-mi siulittaasoq isumaqarpoq.

Taavalu aamma mingutsitseqisunik nunatsinni sakkutooqarfeqarneq apeqquserneqartariaqarsoraa.

- Isumaqarpunga issittoq tamaat isigalugu sakkutooqarneq, tassalu amerikamiut nunatsinni sakkutooqarnerat eqqarsaatigalugu, eqqartoqqittariaqartoq, taamarsuaq suusupaginninneq annertutigisoq pilersillugu sakkutooqarfeqarmata, ICC-p siulittaasua Hjalmar Dahl taama oqarpoq.

Isummersuutit





Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat